Biden, ante as últimas opcións para evitar a quebra dos Estados Unidos

A pesar de que o presidente dos Estados Unidos, o demócrata Joe Biden, cualificou de “produtiva” a reunión que rematou na madrugada desta terza feira co presidente da Cámara de Representantes, o republicano Kevin McCarthy, para “previr o incumprimento [do pago da débeda] e evitar unha catástrofe para a nosa economía”, o acordo ao que agardaba chegar para aumentar o límite de endebedamento do país, que ten que ser aprobado polo lexislativo, non se produciu. Pola súa parte, McCarthy, que tamén aludiu á xuntanza como “produtiva”, destacou que o “ton desta noite foi mellor que en calquera momento anterior”, mais advertiu que “aínda temos diferenzas filosóficas”, nun debate marcado polas eleccións de 2024 nas que Biden busca a reelección. Para McCarthy, que precisou de 15 votacións e moitas cesións na Cámara Baixa para convencer a extrema dereita do Partido Republicano de que o apoiaran para alcanzar a Presidencia, a redución do gasto público é unha condición imprescindíbel para aceptar unha suba do teito de débeda, algo que Biden quere evitar polas limitacións que implicaría nos programas de carácter social que considera o eixo do seu Goberno, e acusou directamente parte dos republicanos de forzar o impago da débeda para garantir que non será reelixido como mandatario. Malia que a formación republicana insiste nunha diminución dos fondos de entidades como o organismo de recadación de impostos federal ou restricións para que a poboación de baixos ingresos acceda a servizos sanitarios públicos, o epicentro do debate é estabelecer un tope para o orzamento de 2024, con McCarthy exixindo que o gasto público de 2024 volva aos niveis de 2022 e fixar un límite de 1% anual ao incremento dos investimentos públicos nos vindeiros seis anos. Ao tempo, a oferta de Biden é manter en 2024 o gasto determinado no orzamento de 2023, cun límite de 1% de alza do gasto público que se aplicaría só en 2025. Medios estadounidenses alertan da volatilidade das bolsas no país perante a incerteza sobre se será posíbel evitar o impago, minimizando o efecto do anuncio do presidente da Reserva Federal, Jerome Powell, de que a entidade non efectuará novas subas das taxas de xuro en xuño, despois de embarcarse nunha alza no último ano que as deixou en 5,25%, o nivel máis alto en máis dunha década e media, unha medida que en teoría pretende reducir a inflación mais “danando a economía en xeral”, admite AP, que alerta de que o “incumprimento do pago da débeda provocaría case con toda seguridade unha recesión”. En todo caso, o tempo esgótase para asinar un acordo, posto que calquera proxecto de lei ten que ser publicado 72 horas antes da súa votación na Cámara Baixa e tamén tería que ser aprobado polo Senado -controlado polos demócratas- antes de que Biden o puidese promulgar, coa data límite marcada o 1 de xuño. Danos á posición internacional dos EUA Ese día, como volveu advertir na segunda feira nunha misiva ás e aos membros do Congreso a secretaria do Tesouro Janet Yellen, “é moi probábel que o Tesouro xa non sexa capaz de satisfacer todas as obrigas do Goberno” se o lexislativo non eleva ou suspende o teito de débeda, o que causaría “graves dificultades ás familias estadounidenses, danaría a nosa posición de liderado mundial e xeraría dúbidas sobre a nosa capacidade para defender os nosos intereses de seguridade nacional”. Gregory Daco, economista xefe da consultora de estratexia global de Ernst &amp; Young, explica a AFP que de non haber pacto “todo estadounidense que directa ou indirectamente dependa dun pago do Goberno deixará de cobrar”, como empregadas e empregados públicos, militares ou persoas que reciban axudas sociais ou asistencia sanitaria. Tampouco cobrarían as empresas contratadas polo Estado, provocando danos equivalentes a 5% do produto interior bruto, estima Daco. Crise mundial Esta situación multiplicaría o risco de quebras empresariais e impulsaría “unha nova crise financeira mundial” cunha depreciación “moi forte” do valor do dólar, sinala o director da escola de negocios francesa Iéseg, Eric Dor, que fai fincapé nas consecuencias de que Washington non sexa quen de pagar os bonos do Tesouro, o que incidiría na cualificación crediticia do país e minaría a confianza das persoas investidoras, elevando as taxas dos bonos e xerando unha caída do consumo e do investimento das empresas e fogares por medio dunha “forte recesión” que podería estenderse a “Europa e outros lugares”. Un potencial choque institucional En última instancia, Biden reiterou que pode aumentar o teito de débeda unilateralmente, apelando a que a Constitución recolle que “non se cuestionará a validez da débeda pública”-mais outorga ao Congreso a responsabilidade de facer cumprir este punto-. Esta decisión, reclamada pola póla progresista do Partido Demócrata, tería o potencial de provocar un choque institucional co Tribunal Supremo, cuxa maioría está controlada por partidarios republicanos.