O asedio de Israel deixa Gaza sen luz ante o inminente ataque militar de forzas terrestres

Chegou a escuridade á Faixa de Gaza, o completo asedio que está a exercer Israel contra este territorio provocou que a súa central eléctrica ficase sen combustíbel, e, en consecuencia, sen a capacidade de xerar enerxía, polo que o apagamento total se deu ás 14 horas. A ONU considera que o asedio de Israel sobre Gaza está "prohibido" polo dereito internacional As autoridades de Gaza sinalaron previamente que isto "imposibilitará a entrega dos servizos máis básicos e pon en risco a vida de 2,2 millóns de persoas, polo que se emitiu unha alerta urxente para pedir axuda á comunidade internacional e ás organizacións humanitarias". Previamente, a situación xa era crítica a raíz do corte eléctrico de Israel, pois a poboación de Gaza ten unha demanda de 550 megawatts mentres que a planta palestina tiña unha capacidade de produción de 205, polo que a enerxía funcionaba tan só durante tres ou catro horas ao día. "Hoxe [por esta cuarta feira] recibimos un informe que indica que a maioría das células solares nos tellados das casas e as instalacións resultaron completamente danadas e non poden xerar enerxía", engadiu a Autoridade de Enerxía palestina. Neste contexto, o Programa Mundial de Alimentos da ONU describiu como "devastadora" a situación na Faixa de Gaza, onde "se van esgotar moi pronto as subministracións de comida e necesidades básicas" se non se garante a repartición da axuda. "Crimes de guerra" Catro médicos da Media Lúa Vermella, organización homóloga á Cruz Vermella na Galiza, faleceron esta cuarta feira a raíz dun ataque de Israel contra unha ambulancia ao norte da Faixa de Gaza. "Deteñan os crimes de guerra. Fagan que as autoridades de ocupación israelitas rendan contas", denunciou a organización. Ghaleb Jaber, palestino asentado na Galiza: "Existía información de que Israel ía bombardear Gaza antes do ataque do sábado" Pola súa parte, a Axencia da ONU para os Refuxiados de Palestina elevou esta cuarta feira a 11 os traballadores da organización que pereceron polos bombardeos de Israel contra a Faixa de Gaza. En adición, un total de 30 dos estudantes palestinos que acudían ás escolas desta axencia das Nación Unidas morreron por estas ofensivas, engadiu a institución. Os ataques alcanzaron a Universidade Islámica de Gaza, que foi bombardeada esta cuarta feira por aviación ao ser acusada de ser un "importante centro político e militar" de Hamás. "Estamos atacando a Faixa de Gaza a unha escala sen precedentes, porque o que pasou aquí é algo que non tiña pasado antes", dixo o xefe da Forza Aérea israelita, Omer Tishler, que recoñeceu que os ataques xa non son "cirúrxicos". Mentres tanto, continúan as mortes de xornalistas, cando menos un máis faleceu esta cuarta feira ao ser alcanzado polas bombas israelitas e xa son un total de oito as persoas desta profesión que pereceron neste conflito. O conflito deixa xa máis de 2.300 falecementos desde o seu inicio o pasado sábado No contexto global, as vítimas mortais da guerra superan xa as 2.300, máis de 1.200 por parte de Israel e máis de 1.100 no caso palestino. Aos pasamentos sumáselles a complicada circunstancia das persoas desprazadas dos seus fogares, que son máis de 260.000 na Faixa de Gaza. Escalada do conflito Os ataques cruzados entre Israel e Hezbolá (grupo chiíta libanés) están facendo escalar o conflito. Cando menos tres persoas resultaron feridas nos ataques de Israel contra territorio libanés. A ofensiva deu resposta ao disparo dun mísil antitanque por parte da organización do Líbano. Así mesmo, foi atacada por Israel a localidade libanesa de Yarin, onde foi destruído o principal depósito de auga. Testemuños desde Palestina: "O tempo está parado desde o sábado; queren reducir Gaza a cascallos e, se o logran, irán por Cisxordania" Hezbolá afirmou esta cuarta feira que os Estados Unidos son "un socio" de Israel e responsabilizounos "dos asasinatos, dos crimes e dos horríbeis masacres" cometidas en Gaza. "Non estamos para nada sorprendidos coa postura política e as accións da Administración estadounidense", salientou o grupo libanés no contexto da chegada dun buque portaavións dos EUA ás augas da rexión onde ten lugar o conflito. Outra posíbel fronte é a de Siria, o Exército de Israel denunciou o lanzamento de mísiles desde o territorio deste Estado, e afirmaron que realizaron unha resposta "con fogo de artillaría e de morteiro". A respecto do ataque, o Observatorio Sirio para os Dereitos Humanos informou de que os mísiles terían sido lanzados por faccións palestinas en colaboración con Hezbolá. No caso de Cisxordania, a tensión é cada vez maior. Cando menos tres palestinos morreron esta cuarta feira por un tiroteo atribuído a colonos israelitas na localidade de Qusra, mentres que outras nove persoas foron evacuadas a hospitais con feridas de bala, dúas delas en estado crítico. No medio deste clima de escalada de hostilidades, o asesor de Seguridade Nacional estadounidense, Jake Sullivan, confirmou que negocia con Exipto e Israel a apertura dun paso seguro para as persoas que buscan fuxir dos bombardeos na Faixa de Gaza. Pola súa parte, as Forzas de Defensa de Israel (FDI) designaron a División Territorial de Gaza como "zona militar restrinxida", prohibindo a entrada ao territorio. Segundo o capitán Roni Kaplan, portavoz das FDI, Israel mobilizou un total 360.000 reservistas a maiores do seu Exército. "Na fronte hai 35 batallóns no límite coa Faixa de Gaza, mentres que 10 batallóns desprazáronse até o norte por se se abren máis frontes no sur do Líbano con Hezbolá", afirmou o líder militar. Neste contexto, o ataque terrestre contra Gaza podería ser cuestión de horas. Pacto de Goberno O primeiro ministro de Israel, Benjamin Netanyahu, e o dirixente opositor e ex ministro de Defensa, Benny Gantz, pactaron esta cuarta feira a creación dun Goberno de emerxencia, nunha unión de forzas considerada polo Executivo israelita como prioritaria para lanzar un ofensiva politicamente consensuada contra Gaza. Por outra parte, o Executivo israelita propuxo aprazar tres meses as eleccións municipais convocadas o próximo 31 de outubro. Solidariedade galega ONG galegas solicitan que se asegure o acceso aos hospitais A Coordinadora Galega de ONG de Desenvolvemento exixiu esta cuarta feira ás autoridades israelitas e palestinas "que respecten e apliquen o dereito internacional humanitario". Neste sentido, advertiu das consecuencias do bloqueo de bens básicos por parte de Israel e solicitou que se aseguren as evacuación médicas e o acceso a centros de saúde e hospitais. Ademais, a coordinadora pediu o recoñecemento do Estado de Palestina e o cesamento da ocupación israelita do seu territorio.