Tulkarem, unha mini Gaza

Tulkarem, no noroeste de Cisxordania, con aproximadamente 150.000 habitantes, ten dous campos de refuxiadas e refuxiados: Nour Shams aloxa máis de 13.500 persoas nunha área de 0.21 km², mentres que o campo de Tulkarem, de 0.18 km², é o fogar de 27.000 persoas. Desde outubro, a violencia por parte de Israel aumentou de maneira exponencial na cidade, onde se producen operacións militares moito máis intensas, algunhas estendéndose por máis de dous días. Nos últimos catro meses rexistráronse 16 invasións: 2 en outubro, 4 en novembro, 4 en decembro e 6 en xaneiro. Laila explica que "durante as redadas sentímonos aterrados e apagamos as luces, porque os soldados atacan todo o que se move". A máis longa tivo lugar entre o 17 e o 19 de xaneiro. "Foi difícil saír da casa para mercar necesidades básicas, como pan. O meu primo pequeno preguntou se íamos acabar como Gaza". Poboación atacada con drones e balas O 12 de xaneiro Khaled Zbaidy recibiu unha malleira e morreu por unha hemorraxia interna. A ocupación sionista ataca e asasina de maneira sistemática, con total impunidade. Entre outubro e xaneiro, 56 palestinos foron asasinados en Tulkarem. O 8 de xaneiro, Ahed Rajab e outros dous mozos foron atacados con balas e morreron desangrados tras pasar dúas horas na rúa. O Exército, que impediu o acceso ás ambulancias, empregou un vehículo militar para pasar por enriba dun dos corpos. Os ataques aéreos con drones, coa poboación como obxectivo, repetíronse nos últimos meses, acabando polo menos coa vida de 17 refuxiados. O 18 de xaneiro, no campo de Tulkarem, Abdul- Rahman Othman foi asasinado e atado a un poste nas escaleiras dunha casa. Unha vez morto foi arrastrado polas rúas cunha corda. Os veciños relatan escoitaren os insultos dos soldados, que chegaron a mexar sobre o corpo. Lina, orixinaria de Tulkarem e que actualmente reside en Ramallah, afirma que "o máis doloroso é ver a xente que coñeces nas fotografías". Arrestos e tortura Os homes, sobre todo, son vítimas de arrestos aleatorios. Cos ollos vendados e as mans atadas, son levados a lugares descoñecidos sen informaren ás familias. O 18 de xaneiro produciuse unha campaña de detención masiva a plena luz do día, na que tamén foron arrestados tres membros do persoal médico da Media Lúa Vermella. O Exército tomou un edificio residencial e transformouno nun centro de interrogación, sometendo os arrestados a diferentes formas de tortura. Vivendas destruídas Con frecuencia, o Exército irrompe en Tulkarem con máquinas escavadoras co propósito de causar danos en propiedades privadas e infraestruturas. As rúas quedan completamente arrasadas e impracticables. O 20 de outubro, destruíron as canalizacións de auga e deixaron áreas da cidade sen electricidade. Segundo explica Lina, "na última operación [30 de xaneiro] o Exército contaminou a auga". O campo de Nour Shams estivo máis de dous días sen acceso a auga potable. Ademais de levantar as estradas, arrincar árbores ou queimar coches, o Exército ataca e detona negocios e vivendas, destruíndo casas parcial ou totalmente. Nestes momentos de frío e chuvia, os veciños vense forzados a vivir en edificios con ventás, portas ou muros detonados, intentando combater o inverno con lonas de plástico. Hospitais atacados O Exército adoita obstruír o movemento das ambulancias, denegando a entrada dos equipos médicos nos campos de Tulkarem e Nour Shams. O 22 de novembro, un mozo ferido de gravidade foi arrestado cando estaba sendo levado en ambulancia ao hospital. O 3 de xaneiro, o Hospital Thabet foi asediado e declarado "zona militar pechada". O hospital e o seu persoal xa sufriran ataques con gas lacrimóxeno en incursións previas. Xornalistas en perigo Diana, xornalista palestina, foi ameazada polo Exército mentres cubría unha das incursións militares. "Un oficial israelí contactou cun colega e díxolle que se cruzabamos esa rúa, dispararíannos". Desde outubro ela e outros compañeiros foron atacados en diferentes ocasións. "Unha vez detivéronme a punta de pistola e impedíronme facer o meu traballo". O 17 de xaneiro Fadi Yassin, cámara de Palestine TV, foi atacado con munición real no vehículo da canle. As forzas sionistas, que violan os dereitos humanos de forma constante, celebran os seus crimes con orgullo Tal e como vén acontecendo en Gaza, os soldados publican vídeos da humillación á que someten á poboación palestina de Cisxordania. Nun vídeo do 18 de xaneiro, pódese ver a seis soldados sentados no salón dunha casa no campo de Tulkarem. " Viñemos recoller as armas que estes terroristas agocharon", di un deles mentres rin e sinalan a un grupo de catro palestinos sentados no chan cos ollos vendados. Despois de máis de dous días de incursión e de teren asasinado a oito palestinos, o 19 de xaneiro outro soldado publicou un vídeo desde unha das rúas arrasadas de Tulkarem, mentres facía soar un shofar (corno de carneiro). As forzas sionistas, que violan os dereitos humanos de forma constante, celebran os seus crimes con orgullo.