África pide a Rusia abordar a fin da guerra en Ucraína

É "esencial chegar a un consenso" para reactivar a iniciativa de exportación de gran ucraíno polo Mar Negro, instou a sexta feira a Moscova o presidente exipcio, Abdel Fattah al-Sisi, na xornada final da segunda cimeira Rusia-África, que comezou a quinta feira en San Petersburgo. Hai que “ter en conta as necesidades dos países que o precisan, así como as consecuencias desta situación para moitos países e pobos”, explicou, polo que reclamou unha solución “con urxencia” que permita garantir a subministración de alimentos aos países que máis o necesitan. O país norteafricano é un comprador histórico de cereais rusos e ucraínos -aínda que as importacións de gran de Ucraína sufriron unha forte caída desde a invasión rusa- e aplica importantes subvencións ao pan, polo que as finanzas públicas se verían moi afectadas no caso dun incremento dos prezos a nivel mundial. Tamén o presidente das Comores e líder actual da Unión Africana (UA), Azali Assoumani, abordou esta cuestión, subliñando as “consecuencias negativas” da guerra en Ucraína "que repercuten en todo o mundo". O Kremlin informou esta semana de que non é posíbel a súa volta ao acordo do Mar Negro asinado hai un ano con Ucraína, Turquía e a Organización das Nacións Unidas (ONU) até que se cumpran os aspectos do acordo referidos á fin dos obstáculos para as exportacións de cereais e fertilizantes rusos, obstruídas polas sancións impulsadas pola Organización do Tratado do Atlántico Norte, e que non se resolveron desde o comezo do acordo. Tras facer público a semana pasada que non prorrogaría o pacto, Moscova reiterou a súa oferta de substituír as exportacións de gran ucraíno e criticou que apenas 3% dos cereais no marco do acordo foran destinados a países de baixos ingresos. Amais, na primeira xornada da cimeira, a quinta feira, anunciou que enviará nos próximos meses entre 25.000 e 50.000 toneladas de cereais de balde a seis países africanos empobrecidos. Crítica da ONU a Rusia O secretario xeral da ONU, António Guterres, criticou que “un puñado de doazóns” non “corrixirá o impacto dramático” de “sacar do mercado millóns e millóns de toneladas de gran”, sinalando que “en base ás leis económicas isto conducirá a prezos máis altos”. O Fondo Monetario Internacional cifrou entre 10% e 15% o posíbel incremento dos prezos mundiais dos cereais, ao tempo que outras entidades negan unha suba importante, dadas as boas colleitas de gran a nivel internacional. Mentres que os Estados Unidos salientaron que están a buscar unha forma de mover o gran ucraíno por terra, fontes do Executivo da Unión Europea admitiron a Reuters que non teñen “diñeiro agora mesmo no orzamento”, así como que "non hai unha maneira clara de axudar a financiar os custos adicionais de transporte que enfrontarán as exportacións de gran ucraíno". Fin da guerra Tamén se abordou directamente a guerra en Ucraína. “Facemos un chamamento urxente á restauración da paz en Europa”, trasladou Denis Sassou Nguesso, presidente da República do Congo, que incidiu en que “a iniciativa africana merece a maior atención e non debe subestimarse”, en alusión á proposta de paz para Ucraína elaborada por varios países do continente co liderado de Suráfrica, e que foi presentada nunha misión internacional aos líderes de Ucraína, Volodimir Zelenski, e Rusia, Vladimir Putin. Pola súa parte, o presidente surafricano, Cyril Ramaphosa, confiou en que o “compromiso e a negociación construtivas” poñan fin á guerra, apuntando que os países do continente agardan continuar a debater o plan con Putin. Moussa Faki Mahamat, presidente da Comisión da UA, subliñou que a organización de integración rexional outorga grande importancia á integridade e soberanía dos Estados xunto á solución pacífica das crises. Nese sentido, Putin afirmou que estudan “coidadosamente” a proposta de paz africana e que están listos para comezar a negociar con Ucraína, mais que é Kíiv quen rexeita a posibilidade das conversas. O Goberno de Zelenski exixe a Rusia retirarse de territorio ucraíno antes de negociar, á vez, o Kremlin reclama a Kíiv que asuma as “novas realidades” sobre o terreo. Presenza internacional O presidente de Burundi, Évariste Ndayishimiye, fixo fincapé en que os Estados africanos deben “contribuír ao desenvolvemento de toda a humanidade”, destacando os distintos mecanismos rexionais que “contribuirán á unidade dos pobos africanos”. Asemade, recalcou que “nunca chamaría pobre a África, isto é un engano común, ao contrario, é un continente moi rico”, após insistir as autoridades rusas en que África é “un novo centro de poder” con posicións moi próximas a Moscova no terreo internacional cando se está a crear “unha nova orde multipolar de verdade”. En paralelo, o presidente da República Centroafricana, Faustin-Archange Touadéra, sostivo que as relacións do país con Rusia axudaron a salvar o sistema democrático e evitar a guerra civil, no contexto do anuncio de convenios de cooperación con máis de 40 países africanos, que recibirán armas e equipos de defensa de Moscova. Amais de Bangui, outra das capitais que se beneficiarán da entrega gratuíta de cereais rusos é Harare. O mandatario zimbabwés, Emmerson Mnangagwa, agradeceu a Moscova o envío, indicando que “se engade” á seguridade alimentaria coa que contan. En última instancia, Assoumani, das Comores, asegurou que “estamos sinceramente agradecidos” pola axuda prestada por Rusia a África, que permitiu “a moitos países tomaren a senda do desenvolvemento”. Derribado un drone na rexión de Moscova O Ministerio de Defensa ruso comunicou a sexta feira que “frustrou un intento do réxime de Kíiv de levar a cabo un ataque terrorista cun drone contra obxectivos na rexión de Moscova”, logo dun ataque esta semana na capital rusa. Ademais, as autoridades da rexión de Zaporijia que responden ante Moscova cualificaron a situación na fronte como "tensa" após o comezo da fase principal da contraofensiva militar ucraína, sen que polo de agora se reportasen avances relevantes. No outro bando, Kíiv transmitiu que está a repeler os ataques rusos no oblast de Donetsk.