Muitas veces o teatro infantil é o máis adulto, o que ten máis sentido, máis xuízo, máis capacidade de desvendar as verdades e as mentiras. Nuncabunga, o espectáculo da compañía Elefante Elegante, obtivo o premio grande da presente edición dos galardóns María Casares, que se entregaron esta cuarta feira no Teatro Rosalía da Coruña.
Non foi o espectáculo que colleitou máis premios. Esa honra foi para Tokio 3, de Voadora, con 5 galardóns, mentres que Viaxe a Ningunha Parte, de Sarabela Teatro, se fixo con 3.
Os responsábeis da cultura galega -digamos o conselleiro Jesús Vázquez- nen se dignaron presentarse na cerimonia de entrega á que si acudiu o flamante director do Agadic, Jacobo Sutil. Actores e atrices acusan a Vázquez de non querer nen dialogar. Onte o conselleiro deulles a razón. Non é xa que non dialogue, é que nen sequer fai acto de presenza no evento anual máis importante da cena deste país.
Houbo espazo para a denuncia da desatención e o desleixo coa que a Administración autonómica trata o teatro galego. En palabras de Toño Casais, presidente da Asociación de Actores e Atrices de Galiza: “Vivimos un desmantelamento dende o 2010. Estamos coa auga ao pescozo e temos a impresión de que alguén nos pon o pé na cabeza".