Os obxectivos fixados na Lei de Residuos de Galiza máis na Directiva europea sobre resituos estanse a incumprir na Galiza onde a Xunta aprobou en xaneiro o “Plan de xestión de residuos urbanos” 2010-2020 que destina á prevención de residuos unicamente un 2,2, % do orzamento total, fronte ao obxectivo de redución do 10% dos residuos xerados.
Os datos que o Plan recolle non son alentadores xa que só dedica un 18,1% á prevención, educación, recollida selectiva e outras actividades de reutilización e reciclase fronte ao mínimo contemplado nas normativas aprobadas do 50% de reutilización. Un 24% destínanse, pola contra, a unha nova planta incineradora para a eliminación da reciclaxe.
“Transcorridos máis de tres anos de vixencia da Lei e da Directiva de 2008, non se adoptaron aínda medidas efectivas de prevención, recollida selectiva, reciclaxe e compostaxe. Mentres, a Xunta está a favorecer outras opcións menos prioritarias e altamente impactantes, como os continuos recrecementos do vertedoiro da Areosa e a instalación dunha nova incineradora no sur de Galicia, incompatíbel co obxectivo de redución do 10% e reutilización e reciclado do 50% dos residuos domésticos”, explican desde Adega, entidade integrada na comisión promotora para a ILP. A incineración é, segundo os datos que manexan, a opción máis custosa e a que menos empregos xenera.
