O Goberno de Bildu en Donostia impulsa unha campaña contra as agresións machistas en Festas

O concello difundirá o lema “Non é Non” para evitar unha violencia que adoita aumentar durante a Semana Grande que comeza este sábado. A campaña estenderase durante todo o verán.

Bildu
photo_camera Bildu

Após de que a gran cantidade de imaxes de agresións machistas producidas durante a celebración do San Fermín de Pamplona engadirá visibilidade ao problema en Euskal Herria, a loita contra esta forma de violencia durante as festas multitudinarias cobrou aínda máis intensidade, chegando a outros puntos do Estado e alcanzando maior visibilidade mediática.

Nese sentido, o goberno municipal de Bildu en Donostia puxo estes días en marcha unha campaña baixo o lema “Non é Non”, para previr as agresións machistas na Semana Grande deste ano, que comeza o sábado. Segundo a edil donostiarra de Igualdade, Naiara Sampedro “este tipo de agresións increméntanse no contexto das festas”. “A violencia machista é unha das consecuencias máis graves da falta de igualdade entre mulleres e homes”, sinalou a representante da esquerda abertzale.

Facer fronte á violencia machista

A campaña posta en marcha polo concello -por quinto ano consecutivo- “non se limitará á Semana Grande senón que é extensiva a todo o verán e outras datas significativas”, segundo fontes oficiais. O goberno local tamén organizou cursos de autodefensa feminista durante o mes de xullo.

No marco da campaña vaise instalar un espazo “para facer fronte ás agresións sexistas”con dous puntos de información no centro da cidade e ademais repartiranse nos bares uns 200.000 panos co lema “Non é Non”, así como un centenar de adhesivos coa frase “Neste local non se admiten agresións sexistas”. Unha pancarta no propio edificio do concello condenará a violencia machista.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Máis en Euskal Herria
comentarios