Como xa se deixou entrever na precampaña, Feijóo tenta marcar distancias con Rajoy. Procurando esconxurar o “efecto Feijoi” para evitar que o PPdeG sexa castigado electoralmente a consecuencia do maioritario rexeitamento social ás políticas levadas a cabo polo partido desde Madrid. Neste sentido, as declaracións de Feijóo tentando desligar os comicios do 21-O das políticas do goberno central son reiteradas desde hai semanas.
O pasado 22 de setembro os populares ofrecían unha curiosa estampa, cando Rajoy participaba nun encontro con militantes en Ourense mentres ao tempo Feijóo falaba a 175 quilómetros de distancia, na Coruña. Desde que encetou a campaña electoral Feijóo e Rajoy só compartiron escenario unha vez, no mitin de Pontevedra do pasado día 6. A ausencia de Rajoy nun acto na súa cidade natal resultaría inexplicábel.
Aliás, Rajoy non acompañou o candidato popular á Presidencia da Xunta en ningún dos outros actos que o PP realizou neste primeiro treito da campaña en Carballo, Vilagarcía, Compostela, Tui, Ferrol, Foz, O Barco ou A Coruña, en que o protagonista en solitario foi Feijóo, acompañado por outr@s integrantes das candidaturas. Esta mesma fin de semana Rajoy realizou unha incursión electoral en Galiza con actos en Guitiriz, As Nogais e Coruña. En ningún estivo presente Núñez Feijóo.
Contrasta o perfil baixo da participación de Rajoy nesta campaña se se compara coa de 2009, en que o líder estatal do PP fixo parte de máis de 40 actos por toda a xeografía galega. Daquela a imaxe constante era a de Feijóo e Rajoy xuntos. A mesma estampa da cal hoxe semellan fuxir.
