Unha tractorada denuncia en Lugo perdas de até 25% nas vendas de Tenreira Suprema

Máis de dous milleiros de profesionais do sector da gandaría de Tenreira Suprema, incluídos máis de 400 tractores, en compañía de outras asociacións e colectivos agrogandeiros, tomaron esta terza feira as rúas de Lugo para protestar "pola situación actual de prezos baixos e altos custos de produción e polos recortes na Política Agraria Común (PAC)". A Tenreira Galega vende a perdas: gandeiros perden un euro por cada quilo de carne Na manifestación, que comezou no polígono lucense das Gándaras, o sector gandeiro, ataviado con chalecos amarelos, saíu cara ao centro da cidade con pancartas nas que se podían ler lemas como "Un prezo xusto para a nosa carne" ou "Basta xa, nin prezos nin axudas''. 400 tractores paralizaron esta terza feira as rúas da cidade das murallas Os profesionais aseguraron que están a cobrar ao redor de 5,60 euros por quilo de carne, cando producir cada un deles cústalles uns 7 euros (+25%). Unha situación que provoca que "moitas explotacións" se vexan obrigadas a "vender vacas". A protesta, á que levaron unha vintena de vacas, transcorreu polo centro de Lugo e concluíu no edificio da Xunta da Galiza, na Rolda da Muralla. O sector da Tenreira Galega protestará todos os días en Lugo O presidente da Asociación de Gandeiros Galegos da Suprema, entidade convocante, Santiago Rego, avanzou que realizarán concentracións diarias fronte á Subdelegación do Goberno estatal e fronte á Xunta "con carácter indefinido" até que escoiten as súas reivindicacións e se acheguen solucións. Ademais, Rego tamén amosou satisfacción pola resposta "unánime" do sector. Testemuñas do sector Hugo Martínez, gandeiro de Tenreira Suprema en Tomiño e afiliado da Federación Rural Galega (Fruga), en declaracións a Nós Diario, afirma que acudiu á manifestación que decorreu en Lugo polo "problema que temos cos prezos". Ao respecto, explica, "márcannos os prezos por abaixo e por arriba, por abaixo nos estabelecen o custo ao que compramos o gasóleo, os pensos e os cereais, mais despois nós non podemos escoller o prezo ao que queremos vender, senón que os impón a industria". Fruga e Unións Agrarias saen en defensa da tenreira galega "Non somos donos do noso propio produto e xa levamos tempo vendéndoo por debaixo do custo de produción", denuncia Martínez. "Hai un ano a Xunta estabeleceu, coa colaboración da Fundación Juana de Vega, que os nosos gastos de media eran 6,20 euros máis IVE (Imposto sobre o Valor Engadido), e nos están pagando 5,60 euros, a día de hoxe, despois dun proceso inflacionista que fixo chegar os custos de produción á contorna dos 7,50 euros", engade. "Tememos pola viabilidade da nosa actividade, xa se veñen fechando explotacións na Galiza desde a entrada na Unión Europea (UE), mais recentemente, desde hai tres anos, as explotacións de vacún están fechando de forma continúa, e son actividades que non se recuperan", afirma o gandeiro de Tomiño. "Trátase de pequenas explotacións en zonas vulnerábeis, e esas terras quedan abandonadas na maioría dos casos, pois son as que máis gastos teñen para producir e as que máis perden, o que implica a desaparición de hectáreas de superficie agraria útil", continúa Martínez. Alén diso, o afiliado da Fruga considera que "é imprescindíbel que as administración velen pola distinción do noso produto, teñen que lexislar e acompañar para que as etiquetaxes e as marcaxes se correspondan coa realidade, pois non pode ser que todos saibamos que están vindo camións de gando desde Castela cara á Galiza e que despois se maten aquí eses animais e se vendan como galegos", conclúe. Por contra, José Ramón González, gandeiro de Tenreira Suprema na Mezquita (comarca da Viana) e afiliado de Unións Agrarias (UUAA), non acudiu á protesta en Lugo. Segundo explica a Nós Diario, comparte que hai un problema, "mais non coincido na maneira de afrontalo". Na súa opinión, "a solución vai vir máis por seguir coa mellora que tivemos no último ano despois de que a suprema tocara fondo en marzo de 2022". "A raíz do acordo da cadea de valor comezamos un camiño de recuperación lento e esperamos que sigamos mellorando porque obviamente as condicións de produción non son fáciles", explica o afiliado de UUAA. "Hai un problema que está provocando que fechen moitas explotacións e que outras se estean dimensionando, iso é innegábel", engade o gandeiro da Mezquita. Porén, di González, "creo que a solución non é unha mobilización neste momento, porque estamos en pleno proceso de recuperación, desde a sinatura do acordo da cadea o prezo de venda subiu máis dun euro mais aínda está por baixo do que marcou a Xunta como limiar dos custos de produción, temos que seguir mellorando e fai falta moito máis apoio institucional". "Agora os custos de produción están baixando, nos pensos levamos unha redución de prezo no que vai de ano de entre 8 e 10% e o gasóleo está abaratándose tamén, hai que seguir traballando e esperar a que as circunstancias melloren", sinala González. "Hai un ano tiña sentido a mobilización, agora toca traballar para que a cadea de valor se axuste e defender que os produtos se vendan por encima dos gastos das explotacións", engade. A respecto da etiquetaxe, o gandeiro da Mezquita opina que "se está mellorando e que hai unha aposta decidida e promoción para a diferenciación da suprema". Porén, di, "non é suficiente co que se fixo o pasado ano, pois a campaña tivo pouca repercusión en comparanza co diñeiro que se gastou". Finalmente, sobre a fraude, afirma "ter constancia de que se está facendo todo o que se pode". A mobilización continuará de forma indefinida até que haxa solucións O presidente da Asociación de Gandeiros Galegos da Suprema, Santiago Rego, en conversa con Nós Diario, sinala que o colectivo gandeiro "manterá a partir de agora un dispositivo continúo e de carácter ininterrompido diante da Subdelegación do Goberno estatal e da sede da Xunta en Lugo até que nos escoiten". Ao respecto, explica, "todos os días desde as 9 horas da mañá e até as 21 horas da noite vai haber unha representación do sector gandeiro en cada un destes dous edificios administrativos". Tenreira Galega pide aumentar prezos para garantir a continuidade das explotacións "Ninguén (dos Gobernos estatal e galego) se puxo en contacto connosco para facer ningún tipo de valoración sobre a problemática tras a manifestación", afirma. "Levamos xa un ano ou un ano e medio denunciando a situación que está vivindo o sector e todos miran a outro lado", engade. "Con esta manifestación queda patente que o sector demanda cambios e que está en xogo a viabilidade de moitas explotacións", prosegue o presidente da Asociación de Gandeiros Galegos da Suprema. "No último ano fecharon moitas explotacións e as que non clausuraron a actividade tiveron que sacrificar vacas reprodutoras para poder pagar as facturas e seguir a flote", láiase o representante da asociación. "A mellora da etiquetaxe é unha das medidas que solicitamos desde a creación da nosa organización, mais a cuestión principal que pode salvar e aliviar o sector é que se cumpra a lei da cadea alimentaria e que se poida pagar ao produtor por riba dos custos de produción, que agora mesmo están na contorna dos sete euros (por quilo de carne de Tenreira Suprema)".