A burocratización alimenta o descontento do sector agrario galego: "Xerará gastos inasumíbeis"

Esta terza feira están convocadas polas organizacións agrogandeiras galegas, e baixo o lema Polo futuro do sector produtor”, tractoradas e concentracións por todo o país. Entre as demandas do sector está a eliminación da excesiva burocratización. As novas normas procedentes da Política Agraria Común (PAC) e os cambios na lexislación que aplicou nos últimos anos o Ministerio de Agricultura, Pesca e Alimentación (MAPA) implican excesivas horas de traballo e, en moitas ocasións, un gasto extra en contratación de profesionais. Ademais, os atrasos na publicación e organización dalgunhas destas leis por parte da Xunta da Galiza, trastornaron a resolución das axudas que proceden da Unión Europea (UE). Caderno dixital A entrada en vigor en marzo do ano pasado da nova PAC para o período 2023-2027 estabeleceu a entrada en vigor progresiva do caderno de explotación dixital, unha ferramenta que supón cambiar esta ferramenta cara un soporte dixital onde dar conta do uso de insumos e anotacións sobre aplicacións de fitosanitarios e fertilizantes. Esta información, despois, chegará ás administracións de maneira telemática. A medida, posposta en varias ocasións, será obrigatoria a partir de setembro deste ano, aínda que na última reunión do MAPA cos sindicatos, o Goberno español asegurou que sería "só unha medida voluntaria". Fruga e SLG fan chegar ás forzas políticas cadansúas propostas para o sector agrario En opinión da Federación Rural Galega (Fruga), o seu coordinador, Manuel da Cal, indica a Nós Diario que é algo "que xa se fai mais agora pasa a ser telemático". Alén da propia complicación do seu uso, pon en evidencia que implica "dar conta de todas as operacións que fas nunha leira no prazo dun mes para non ter unha sanción". No caso galego, e da Fruga, Da Cal relata que coñece explotacións que declaran á PAC duascentas fincas de pequeno tamaño "e hai algunhas zonas que teñen até 400 parcelas". Neste tema, Ana Rodríguez (SLG), engade a Nós Diario que as opcións son malas "ou ben teño que seguir o caderno que non rematou a Xunta ou contratar un privado cun custo de actualización anual". Ademais, cre que "95% das granxas non serán capaces de facelos ou non teñen tempo polo que non terán outra que contratar persoal". Para o secretario de Coordinación Sectorial de Unións Agrarias (UUAA), Félix Porto, esta "imposición" é unha auténtica "barbaridade". Neste sentido a primeira razón provén "da falta de internet que temos no país", algo ao que lle suma "a alta idade das persoas que levan as explotacións na Galiza". UUAA defende que o lobo "non está" en perigo de extinción na Galiza e pide máis axudas para paliar os ataques Decreto de ordenación de explotacións bovinas Outro dos puntos de fricción que implica a burocracia foi o Decreto de ordenación de explotacións bovinas que regula as instalacións e as cuestións de benestar animal. A resolución, aprobada polo Consello de Ministras 2022, estabelece as normas básicas que deben cumprir as explotacións de gando en relación á capacidade produtiva máxima, as condicións mínimas de infraestrutura, equipamento e manexo, localización, bioseguridade, benestar animal, condicións hixiénico-sanitarias e requisitos ambientais. Estabelécense diferenzas entre os requisitos para as granxas novas respecto das existentes, estas últimas cun período. Desde a Fruga, entenden que esta norma "implica outro gasto, como é o da contratación doutro veterinario, por non chegar cos que xa se teñen nas propias explotacións". Como exemplo sobre esta norma, Ana Rodríguez explica a Nós Diario o seu caso, no que xa conta con varios servizos veterinarios "e agora terei que contratar outro máis que me faga un servizo que será, sobre todo, cubrir papeis sobre o benestar animal". Neste contexto coincide tamén Félix Porto, que entende que a medida é "unha duplicidade que non ofrece ningún tipo de seguridade alimentaria a maiores". Lence e SLG reúnense para avanzar na colaboración bilateral de cara ao futuro A fertilización sostíbel de solos Desde o 1 de xaneiro de 2024, as explotacións galegas teñen as mesmas obrigas que as gandarías de modelo intensivo e industrializado tamén no tema de fertilizantes. Por este motivo deben anotar no caderno de campo calquera achega de nutrientes que realicen nas súas parcelas. Obrígaselles, polo tanto, a dar conta do esterco sólido, xurro ou calquera outro abono orgánico que empreguen. Ademais de anotar a forma de aplicalos nas súas terras, deben reflectir o valor agronómico do material utilizado e incorporar a información da dose por hectárea, o contido en metais do produto e, en fertiirrigación, o volume de auga aplicada. Alén disto, as granxas deben ter un Plan de Abonado a partir do 1 de outubro de 2024, quedando exentas aquelas que teñas menos de 10 hectáreas. Para facer eses plans de abonado, as explotaciónso teñen que coñecer as características e o contido en nutrientes dos chans. O control da cadea alimentaria, fundamental para sindicatos e organizacións do agro e do mar Sobre isto, Da Cal aclara que é outro gasto por "ter que realizar as análises da terra un técnico", unha circusntancia que, adianta, "non será posíbel pola actual capacidade dos laboratorios galegos". Ademais, "xa non se poderá aplicar o método tradicional de xurros en abano e pasará a ser a través de inxectores". Neste sentido, Porto asegura que "aínda que quixeran non hai inxectores no país abondo para comprar". Á mesma conclusión chega o SLG "tal e como están constituídas na actualidade as explotacións do país".