O sector servizos aumenta a súa dependencia do comercio e da hostalaría

O indicador de actividade no sector servizos rexistrou no mes de abril na Galiza un incremento de 0,2% respecto ao mesmo mes do ano anterior, unha taxa interanual inferior en 14,8 puntos porcentuais á do mes de marzo, segundo se desprende do Informe sobre os indicadores de actividade e de valor engadido bruto do sector servizos, publicado esta cuarta feira polo Instituto Galego de Estatística (IGE). A nivel estatal, a cifra de negocios no sector servizos creceu 0,8%, e aínda que supón unha taxa 8,9 puntos porcentuais menor que a do mes anterior, supón un ritmo de crecemento catro veces maior que o galego en 12 meses A CIG demanda negociar o convenio de hostalaría A dinámica do sector servizos entre abril de 2022 e de 2023 foi moi diferente na Galiza que no Estado. Mentres que a nivel galego o comercio, cun incremento de 2,2%, suma 0,6 puntos porcentuais á taxa de variación do índice xeral, os outros servizos reduciron a súa facturación 4,3% e restan 0,4 puntos porcentuais. Pola contra, a nivel estatal a facturación do comercio diminuíu 2,2% e as vendas nos outros servizos aumentaron 7%. A caída dos outros servizos alén do comercio podería ser moito maior na Galiza de non ser polo aumento da actividade no sector da hostalaría, que alcanzou unha repunta nas vendas de 20% durante o período, a maior entre as categorías. O sector hostaleiro tamén aumentou a facturación no Estado español, aínda que a economía estatal non se apoiou tanto neste apartado, cun incremento interanual de 10,7%. As actividades que requiren de maior cualificación creceron menos que no Estado Os peores resultados de facturación no sector servizos galego en clave comparativa co Estado español foron nas actividades consideradas de maior valor engadido e importancia estratéxica, e que ademais precisan dunha maior cualificación laboral. Desta maneira, mentres o crecemento das actividades profesionais, científicas e técnicas na Galiza foi de 5,2%, esta taxa avanzou máis do dobre a nivel estatal, ao subir a facturación 10,9%. Ademais, o ascenso tamén é maior no conxunto do Estado (7,8%) que na Galiza (5,1%) no campo das informacións e comunicacións. Nas actividades comerciais, o comercio por xunto crece 1,4%, co que achega 0,3 puntos porcentuais á taxa de variación do índice xeral, o comercio retallista cun incremento de 4,5% achega tamén 0,3 puntos porcentuais e a venda e reparación de vehículos de motor achega 0,1 puntos, cunha taxa de 3,6%. Os outros servizos reducen a cifra de negocios na Galiza en 4,3%. Esta caída débese ao transporte, que reduce a súa facturación en 13,2%, mentres que os outros sectores rexistran taxas positivas. Por contra, no Estado, os outros servizos crecen 7%, xa que todos os sectores rexistran taxas positivas agás o transporte, que permanece estábel cunha caída de apenas 0,2%. O maior crecemento da actividade a nivel estatal foi nas actividades administrativas e os servizos auxiliares (12,4%), por riba da taxa galega (11%). Datos de emprego O persoal ocupado no sector servizos creceu na Galiza 1,1% en abril respecto ao mesmo mes do ano anterior, practicamente a metade do ascenso no conxunto do Estado, cunha taxa de 2,1%. O sector servizos lidera a caída do paro na Galiza A ocupación creceu 1,5% no comercio e 0,7% en outros servizos. As maiores subas déronse nas actividades profesionais, científicas e técnicas (3,3%), no comercio por xunto (2,4%) e en información e comunicación (1,7%). As actividades con redución de emprego foron a venda e reparación de vehículos de motor (-1,5%), o transporte (-0,4%) e as actividades administrativas e servizos auxiliares (-0,4%). De forma paradoxal, o aumento da facturación de 20% da hostalaría galega tan só se traduciu nunha suba de 0,4% no emprego neste sector. En contraste, un incremento da actividade hostaleira de case a metade a nivel estatal (10,7%) traduciuse nun ascenso de 3,6% na ocupación. No caso do comercio, a pesar de que a evolución da facturación foi positiva na Galiza (2,2%) e negativa no conxunto do Estado (-2,2%), o aumento interanual do emprego en abril de 2023 foi exactamente o mesmo en ambos os dous casos (1,5%). Tamén son rechamantes as diferenzas na evolución da ocupación noutros sectores, onde a facturación produciu unha maior creación de emprego no Estado que na Galiza. Desta forma, a evolución da poboación ocupada en información e comunicacións a nivel estatal (4,7%) practicamente triplica a galega (1,7%). Ademais, mentres cae a ocupación na Galiza no sector do transporte (-0,4%), sobe no conxunto do Estado (3,3%). A facturación da industria galega caeu en abril en 4,7% interanual Esta cuarta feira tamén se deron a coñecer os datos da evolución da facturación do sector industrial en abril, aínda que sen ser desagregados a nivel galego. Así, a cifra de negocios da industria diminuíu 4,7% en abril na Galiza en relación co mesmo mes do ano anterior, tras 12 meses consecutivos de subas interanuais. A caída da facturación da industria galega (4,7%) é menor que a estatal (8,1%). Porén, no Estado español interrompeuse unha tendencia de aumentos das vendas o dobre de longa que a da Galiza, poñendo fin a 25 meses de aumentos, segundo os datos que publicou esta cuarta feira o Instituto Nacional de Estatística (INE). O sector terciario, nos últimos postos do Estado Tanto na evolución da facturación do sector servizos como na da ocupación do mesmo, a Galiza ocupa a quinta posición pola cola entre o conxunto das autonomía do Estado español. As vendas do sector caeron en abril na súa taxa interanual en Nafarroa (-3,8%), na Comunidade de Madrid (-2,9%), en Castela e León (-2,2%) e en Euskadi (-1,1%). Entre as autonomías con subas a da Galiza foi a menor (0,2%). Por outra parte, con respecto á creación de emprego no sector servizos, tan só caeu en Cantabria (-0,8%). A menor suba interanual da ocupación tivo lugar en Castela e León e Aragón (ambas 0,6%), seguidas do País Valencià (1%) e da Galiza (1,1%). Expectativas postas nas rebaixas de verán A Organización de Consumidores e Usuarios (OCU) afirmou esta cuarta feira que aínda que o prezo do vestido e do calzado baixou 2,5% (na Galiza) no que vai de ano, a inflación seguiu subindo, en concreto, 1,4% desde xaneiro, "lastrando de forma preocupante a solvencia familiar". A desregulación das rebaixas e a inflación prexudican as vendas do pequeno comercio Porén, a OCU subliñou que moitas familias aproveitarán as rebaixas de verán que comezan hoxe para afrontar a compra de vestido e calzado que teñen pendente, en tanto que unha ampla maioría dos fogares galegos e estatais "carecen de capacidade de aforro".