A repartición das cotas de pesca na UE deixa alegrías e decepcións entre os sectores da frota

Até tres xornadas foron precisas para que os Ministerios de Pesca da Unión Europea (UE) alcanzasen finalmente un acordo. Con todo, esta terza feira chegou a resolución sobre o reparto das cotas de pesca na UE. O acordo para a repartición das capturas no Atlántico e no Mar do Norte para 2024, tamén para 2025 e 2026 nalgunhas poboacións, así como para as capturas no Mediterráneo e no Mar Negro, inclúe un aumento de 9,7% das capturas de pescada sur para o Estado español, até case 11.000 toneladas, suba da que se verán beneficiadas as frotas da Galiza, de Asturias, de Cantabria, de Euskadi e de Andalucía. Mais non todas son boas novas para a frota galega, posto que as negociacións co Reino Unido supuxeron unha redución importante do total de capturas admisíbeis (TAC) para a pescada norte, cun recorte que alcanza 12,5%. Por outra parte, o TAC do linguado tamén se vai ver reducido, até 60% no caso do Gran Sol e até 17% en augas ibéricas. A UE acorda cotas pesqueiras co Reino Unido e Noruega Ademais, continuará o período de veda de seis meses para calquera actividade pesqueira comercial da anguía, con certas exencións. Así mesmo, seguirá prohibida a súa pesca recreativa. Fixáronse por primeira vez cotas plurianuais, como é no caso da solla, do corbelo ou do linguado. Porén, entre xaneiro e abril a pesca recreativa non poderá capturar abadexo e, a partir desa data, só dúas pezas tendo que liberar o resto. Unha especie, o abadexo, na que se impuxo unha cota provisoria no primeiro semestre do ano que será de 500 toneladas no golfo de Biscaia, o que supón un recorte de 53%. A partir de aí, avaliaranse os datos para despois fixar unha TAC definitivo para o resto do ano. Pola contra, experimentan un incremento as cotas do rapante (+11,4%), do rape (+7,2%) e do xurelo do sur -desde Fisterra até o golfo de Cádiz- (+5,3%) no que respecta ao acordo sobre o Atlántico, mentres que se mantén o TAC de 33.000 toneladas de anchoa no golfo de Biscaia. No que respecta ao lagostino, estabeleceuse unha cota de 12,4 toneladas para o leste do Cantábrico durante o ano 2024, o que supón un incremento de 3% respecto ao exercicio anterior, mentres que se mantivo en 32 toneladas no caso do golfo de Cádiz, a pesar da redución que foi proposta nun primeiro momento polo Executivo da UE. A evolución da especies deixa un sabor agridoce A pescada marca a actualidade pesqueira dun modo agridoce, no caso da do sur, despois de anos e anos nos que non sufriu outra cousa que recortes nos TAC, experimentou un aumento de 10%, alcanzando a súa cota máis alta no que vai de século. BNG demanda a Planas que reclame na UE a suspensión do veto ás artes de pesca de enmalle e palangre Mais o caso da pescada norte, que sufrirá un descenso no total de capturas admitidas de 12,5%, deixa a nota negativa para o sector do pincho, unha frota que practicamente se sustenta en exclusiva da pesca desta especie. A pesar dos sentimentos encontrados que deixa o acordo dos TAC na frota galega, o delegado do Goberno español na Galiza, Pedro Branco, cualificou de "acordo histórico" o incremento das capturas de pescada para o Estado en 2024, o que suporá, segundo argumentou, "un impulso" para a frota galega. "Trátase dun acordo histórico froito dunha longa, complexa e difícil negociación da que saímos moi satisfeitos", subliñou. Basilio Otero dixo "non estar satisfeito" pola "forte caída" no TAC do abadexo Unha opinión coa que non coincidiu o conselleiro do Mar, Alfonso Villares, que cualificou de "decepción" o acordo dos TAC de pesca para 2024, xa que "en nada se mellorou a proposta inicial que trasladou a Comisión". O presidente da Federación Estatal das Confrarías de Pescadores e patrón maior de Burela (A Mariña), Basilio Otero, afirmou "non estar satisfeito" co acordo por haber unha "caída moi forte" do abadexo. Con todo, coincidiu en que o resultado final "podía ser peor". "Amólanos no Cantábrico o abadexo, tiñamos moi pouca cota, que está agora mesmo fechada, e vai haber menos", resaltou Otero. "O ano que vén vai haber 53% menos e vai fechar moito antes, entón vai ser un problema para unha parte da frota", razoou. Polo resto "non vexo maior problema, pois hai unha suba de 10% na pescada sur", mais "este ano xa non a acabamos", dixo. Aínda que hai unha baixada na pescada norte no acordo co Reino Unido para o Gran Sol, Otero expuxo "que había suficiente TAC, polo que tampouco era algo que preocupase moito". Ademais, o presidente da federación estatal explicou que a anguía queda como o ano pasado, "unha especie importante para certas zonas, mais pensábase que se podía ir a peor". A respecto do TAC do xurelo, hai un aumento ao sur de Fisterra mais, dixo, "aí non había problema, senón no caso de Fisterra cara a Francia, onde segue igual". Javier Touza recoñeceu "as dificultades" pola cota do linguado Pola súa parte, o presidente da Cooperativa de Armadores de Vigo (ARVI), Javier Touza, asegurou que o balance é "moi positivo". Entre outras cuestións, resaltou que se conseguiu introducir o concepto dos TAC plurianuais, o que permitirá ás empresas "facer previsións a varios anos", de forma que se "estabelecen novas dinámicas". Estas son as reclamacións da frota da UE para mellorar a xestión das zonas pesqueiras do Atlántico Non obstante, o presidente dos armadores de Vigo recoñeceu "as dificultades" na negociación polo abadexo e o linguado, que sufriron importantes recortes. A pesar da baixada de 53% no caso do abadexo, Touza apuntou que o TAC provisional de 500 toneladas no primeiro semestre do ano "polo menos é un respiro". Francia e Italia complicaron o avance das negociacións Non chegou até a mañá desta terza feira o acordo nunhas negociacións que comezaron o domingo. As conversas complicáronse polas reclamacións de Francia e Italia en relación coas condicións que foron impostas no Mediterráneo, e que o Estado español, que presidía a xuntanza, buscaba tamén "amortecer". Así, mentres que a Comisión Europea se mantiña "inflexíbel" na súa proposta de reducir os días de pesca nesta zona en 9,5%, ambos os Estados tentaron mitigar ese recorte cun aumento dos días do mecanismo de compensación, que se fixou en 5% sempre que se cumpran dous condicións entre selectividade, portas voadoras e fechamento de zonas, e de 6% de cumprirse os tres requisitos sinalados. "Drama e tensión" O ministro de Pesca do Estado español, Luis Planas, atribuíu a demora na sinatura final do acordo entres os Estados da UE para o reparto das cotas de pesca á "maxia" da negociación dos TAC, xa que "hai sempre un punto de drama e de tensión". Finalmente, o acordo para o reparto dos TAC saíu adiante co voto en contra de Italia en ambos os expedientes, tanto no do Atlántico como no do Mediterráneo, así como a abstención de Grecia en relación ao último deles.