Joaquín Yvancos, exavogado de José María Ruiz-Mateos, está a ultimar unha querela de pequenos deaccionistas de Pescanova contra o consello de administración (para o que pediriían até seis anos de prisión) e a CNMV, querela que presentará perante a Audiencia Nacional, tal e como recoñeceu o letrado a Europa Press.
Son accionistas minoritarios que cunha media de entre 20.000 e 30.000 euros en accións de Pescanova, aínda que tamén hai un camioneiro de Cuenca con 400.000 euros investidos.
A querela estaría xustificada porque a dirección da empresa tería cometido "un delito societario e de manipulación contábel",e denuncia o que este avogado considera que é "falta de control e regulación" da CNMV.
Pescanova ten até esta sexta para presentar as contas. Segundo se recolle na prensa especializada, existe unha preocupación por se o paso dado por Pescanova implica unha fervenza de preconcursos en filiais. De feito, unha delas xa optou por esa vía: Pescafina. Esta empresa está participada nun 95% por Pescanova desde febreiro de 2002. Segundo se recolle na propia web desta filial, facturou 458,27 millóns de euros en 2009 que corresponden a 61.211 toneladas de produtos conxelados.