Os prezos industriais diminuíron 7,7% en xullo na Galiza en relación ao mesmo mes de 2022, mentres que a baixada foi de 0,2% en comparación co mes de xuño, segundo os datos que publicou esta sexta feira o Instituto Nacional de Estatística (INE).
Trátase da quinta caída consecutiva da taxa interanual de inflación industrial na Galiza, despois de que se experimentara previamente, entre marzo de 2021 e febreiro de 2022, un ciclo de dous anos de subas continuadas, con incrementos que chegaron a superar 50%.
A caída dos prezos industriais na Galiza correspóndese sobre todo coa evolución da enerxía, que se anotou unha redución interanual de 26,6%. Tamén baixaron, neste caso 2,8%, os prezos dos bens intermedios (os recursos necesarios para desenvolver o proceso produtivo).
Pola contra, subiron 8,9% os prezos dos bens de consumo (os que xa están preparados para a adquisición das persoas usuarias) e 1,2% os dos bens de equipo (os necesarios para a produción doutros bens).
Por actividades, as maiores caídas déronse no fornecemento de enerxía eléctrica, gas, vapor e aire acondicionado (-25,1%), na industria do papel (-20,3%) e na metalurxia (-14,5%).
Datos estatais
A nivel estatal, os prezos industriais diminuíron 8,4% interanual, unha caída maior que a galega (-7,7%). Porén, ao contrario que a nivel galego (-0,2%), os custos da industria estatal incrementáronse con respecto a xuño (+0,1%).
Segundo o INE, a nivel do Estado español, ao descontar a enerxía, os prezos industriais mostraron en xullo un avance interanual de 1,9%, cifra dúas décimas porcentuais inferior á de xuño e case 10,5 puntos porcentuais superior á taxa xeral.