sábado 22/01/22

Luz verde á vacina de Novavax que fabrica Biofabri no Porriño

A Axencia Europea do Medicamento (EMA) autoriza a vacina de Novavax, cuxo antíxeno prodúcese na planta porriñesa de Biofabri, do grupo Zendal.
A vacina de Novavax recibe o visto bó da EMA (Foto: vladim_ka).
A vacina de Novavax recibe o visto bó da EMA (Foto: vladim_ka).

A Axencia Europea do Medicamento (EMA, polas súas siglas en inglés) vén de autorizar a comercialización condicional para 'Nuvaxovid', a vacina contra a Covid-19 de Novavax (tamén coñecida como NVX- CoV2373), que se fabrica nas instalacións de Biofabri no Porriño, para previr a Covid-19 en persoas a partir dos 18 anos de idade.

'Nuvaxovid' convértese así na quinta vacina recomendada na UE fronte á Covid. Ao contrario que as de Pfizer e Moderna, de ARNm, a de Novavax está baseada en proteínas e adminístrase en dúas inxeccións, normalmente no músculo do brazo, cun intervalo de 3 semanas.

Tras unha avaliación exhaustiva, o Comité de Medicamentos de Uso Humano (CHMP, polas súas siglas en inglés) da EMA concluíu por consenso que os datos sobre a vacina "eran sólidos e cumprían os criterios de eficacia, seguridade e calidade da Unión Europea".

Segundo a  EMA, os efectos secundarios observados con ' Nuvaxovid' nos estudos foron "xeralmente leves ou moderados e desapareceron nun par de días despois da vacinación". Os máis comúns foron sensibilidade ou dor no lugar da inxección, cansazo, dor muscular, dor de cabeza, sensación xeral de malestar, dor articular e  náuseas ou vómitos.

A seguridade e a eficacia da vacina seguirán controlándose a medida que se utilice na UE, mediante o sistema de  farmacovigilancia da UE e estudos adicionais da empresa e as autoridades europeas.

Outras vacinas con selo galego

Desde xaneiro, a factoría do Porriño, pertencente ao grupo Zendal, produce un lote semanal do antíxeno da vacina de Novavax, aínda que tamén traballa na produción da vacina experimental do Consello Superior de Investigacións Científicas (CSIC), en fase de ensaios.

As instalacións de Biofabri no Porriño, centro de referencia para a produción de vacinas contra a Covid, foi candidata meses atrás a producir outra vacina que aínda non conta co visto bó da EMA, a rusa Sputnik V, máis o interese non se materializou finalmente nun acordo pola falta de interese da Xunta, apuntan fontes da negociación.

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Luz verde á vacina de Novavax que fabrica Biofabri no Porriño
comentarios