O Goberno estatal fecha a porta a incluír carne e peixe na prórroga da rebaixa do IVE

O Consello de Ministros e Ministras do Estado español ten previsto resolver esta terza feira se renova, e en que condicións, as medidas 'anticrise' que caducarán o vindeiro 30 de xuño, como a rebaixa do Imposto sobre o Valor Engadido (IVE) de determinados alimentos básicos. Esas medidas recolléronse nun decreto lei aprobado o pasado decembro co obxectivo de conter as consecuencias da inflación. Moncloa manterá a rebaixa do IVE aos alimentos mais Calviño advirte que as medidas 'anticrise' serán "máis cirúrxicas" A vicepresidenta primeira e ministra estatal de Asuntos Económicos e Transformación Dixital, Nadia Calviño, xa adiantou esta segunda feira a súa intención de manter a rebaixa do IVE en determinados alimentos de primeira necesidade até que os niveis de prezos sexan "máis adecuados". "Estamos pendentes dos datos dos prezos en xuño, que non coñeceremos até final de mes, e esta quinta feira teremos o primeiro avance. Mais si se ve que o prezo dos alimentos segue estando elevado. Por iso cremos que se ten que manter, mais sempre vinculado a como vaian evolucionando os prezos nos próximos meses", apuntou. Preguntada por se baralla estender a rebaixa do IVE á carne e ao peixe, a vicepresidenta primeira alegou que xustamente no último mes baixou o prezo do peixe. Porén, aínda que é certo que o prezo do peixe fresco e refrixerado reduciuse en maio con respecto a abril en 3,4%, o seu custo aumentou 2,1% con respecto ao mesmo mes de 2022. Ademais, o prezo do peixe conxelado, aquel que xeralmente consomen as familias con menos recursos por ser economicamente máis accesíbel, incrementou en 0,7% na súa taxa mensual e en 10,5% no índice interanual. Por outra parte, todas as tipoloxías de carne sufriron un aumento de custo no mes de maio tanto na taxa mensual (subas entre 0,1% e 1,2%) como na interanual (entre 5,8% e 17,7%). "O que vemos é que están a evolucionar os prezos dunha maneira que fai conveniente estender as [rebaixas do IVE] que xa temos en marcha", defendeu Calviño, fechando a porta a rebaixar o IVE da carne e o peixe. A este respecto, a Asociación de Fabricantes e Distribuidores (Aecoc) deu a coñecer esta segunda feira o seu novo estudo Aecoc Shopperview, segundo o cal 82% das persoas usuarias cambiou os seus hábitos de compra en carne e peixe frescos para reducir o custo da súa cesta da compra. Para a compra de carne, 46% das usuarias afirma que actualmente busca máis ofertas e promocións para limitar o gasto na súa compra. Pola súa parte, 36% reduciu a cantidade que compra e 26% optou por cambiar a tipoloxía de carne que consome por categorías máis económicas. No caso do peixe, a procura de ofertas e promocións e a redución do volume de compra volven ser os cambios de hábitos máis adoptados polas usuarias, con 42% e 30% das enquisadas respectivamente. Por outra parte, 27% optou por cambiar a compra de produto fresco por peixe conxelado para abaratar o gasto no seu cesto da compra. Opinión do sector primario Entidades agrarias instan a realizar controis sobre a cadea alimentaria O coordinador xeral da Federación Rural Galega (Fruga), Manuel da Cal, en conversa con Nós Diario sobre a ampliación da rebaixa do IVE a diversos alimentos de primeira necesidade, afirma que é unha medida que "en principio parece ben". Porén di, "fican excluídos determinados alimentos que nós consideramos básicos, polo que habería que ampliar a rebaixa, por exemplo, á carne e ao peixe". Por outra parte, sinala Da Cal, "é necesario un control da cadea alimentaria para saber quen queda cos beneficios duns prezos tan altos". Pola súa parte, Isabel Vilalba, secretaria xeral do Sindicato Labrego Galego (SLG), aposta "por ir ao fondo desta cuestión e regular, no que atinxe tamén aos prezos, tanto en orixe como en destino, o mercado alimentario". Ademais, Roberto García, secretario xeral de Unións Agrarias (UUAA), defende que "é un erro non incluír a carne e o peixe na rebaixa do IVE e non considerar que estes alimentos son unha parte imprescindíbel da dieta". As confrarías acusan o goberno estatal de "non abrir os ollos" sobre o beneficios de comer peixe Tamén en declaracións a Nós Diario, o presidente da Federación Galega de Confrarías, José Antonio Pérez Sieira, sobre a decisión de non incluír o peixe na rebaixa do IVE, opina que o Goberno español "aínda non abriu os ollos e aínda non despertou sobre que significa o peixe como alimento para o ser humano". 45% dos alimentos co IVE rebaixado subiron de prezo Segundo denunciou Facua-Consumidores en Acción este mes, o prezo máis de 44,7% dos alimentos afectados pola rebaixa do IVE encareceu no primeiro semestre de 2023 nas cadeas de supermercados. A asociación revisou a evolución de 999 prezos en oito cadeas de distribución, detectando que en 447 dos alimentos, 44,7% do total, o prezo encareceu con respecto ao que tiñan o pasado 30 de decembro unha vez aplicada a rebaixa do IVE. 45% dos alimentos con rebaixa do IVE encareceron nos supermercados Ademais, Facua desvelou que os estudos de prezos que o Ministerio de Agricultura anunciou que realizaría para asegurar que os supermercados non se aproveitaban das rebaixas no IVE non se están facendo. Así o recoñeceu o propio Ministerio, que afirmou en resposta a Facua que non realizou eses estudos porque "non ten atribuídas competencias en materia fiscal". O sector do transporte pide subir as axudas ao combustíbel O Goberno do Estado pon fin ao desconto xeneralizado dos combustíbeis A Confederación Española de Transporte de Mercadorías (CETM); na que están integradas a Federación Galega de Transportes de Mercadorías (Fegatramer), a Asociación Coruñesa de Transportes Discrecionais e Especiais (Acotrades), a Asociación de Empresarios de Transporte de Mercadorías e Escavacións de Pontevedra (Asetranspo) e Asociación de Empresarios de Transporte Discrecional de Mercadorías (Tradime); solicitou ao Goberno do Estado español que aprobe no Consello de Ministros e Ministras desta terza feira a prórroga do desconto aos carburantes para o sector do transporte profesional, que actualmente está en 10 céntimos de euro por litro de combustíbel, mais pediu tamén que se volva a elevar a 20 céntimos por litro. Sen resposta A vicepresidenta primeira do Goberno español e ministra de Asuntos Económicos, Nadia Calviño, afirmou esta segunda feira que, aínda que Executivo estatal foi selectivo nas medidas 'anticrise', estas terán que ser "cada vez máis cirúrxicas", e non quixo avanzar se será prorrogada a axuda ao gasóleo profesional. Calviño espera que a inflación siga en proceso de desaceleración, de forma que as medidas 'anticrise' deixen de ser necesarias "aos poucos".