Galiza exportou no primeiro trimestre do ano 51,9% da súa produción eléctrica

Segundo os datos do primeiro trimestre de 2023 que vén de facer públicos Rede Eléctrica Española, a xeración eléctrica alcanzou entre xaneiro e marzo deste ano 7.693.136 megawatts a hora (MW/h) na Galiza, o que representa un aumento da produción de 26,8% en relación co mesmo período de 2022. A electricidade de orixe non renovábel sumou 1.397.253 MW/h, rexistrando unha caída en relación ao mesmo período do exercicio anterior de 8,2%. A baixada da produción eléctrica mediante estas tecnoloxías no primeiro trimestre da anualidade concretouse após dispararse no mesmo período de 2022, como resultado da decisión do Goberno do Estado de volver activar a produción de electricidade na central térmica das Pontes, co obxectivo de facer fronte ás necesidades de subministro e aliviar o prezo da luz. A Galiza xerou 6.295.883 MW/h de orixe renovábel no primeiro trimestre de 2023. As enerxías limpas representaron 81,8% do total da produción eléctrica galega, destacando 3.117.202 megawatts de tecnoloxía hidráulica, 3.052.310 megawatts de procedencia eólica e 126.371 megawatts doutras fontes renovábeis. Resultou significativo o incremento da electricidade de orixe renovábel a respecto do primeiro trimestre de 2022. Greenalia abre as portas da eólica galega á francesa Engie A xeración renovábel alcanzou nos tres primeiros meses de 2022 un total de 3.965.464 MW/h, isto é 37,1% menos que no mesmo período de 2023. Concretamente, as subas más elevadas tiveron lugar na electricidade de tecnoloxía hidráulica; porén tamén é relevante no caso da eólica. Destaca a forte caída da produción de enerxía renovábel de 2022, cun 43% menos que no mesmo intervalo de 2021, nomeadamente debido ao baixón da electricidade de orixe hidráulica, como consecuencia dunhas condicións climatolóxicas marcadas por unha importante seca e pola ausencia de choivas. Fernando Branco, membro do colectivo de debate enerxético Bidán, sinala a Nós Diario que “estamos diante dun trimestre clásico de gran xeración eléctrica de orixe renovábel que vai ter unha caída importante nos vindeiros meses”. Nesta liña, apunta que “a enerxía hidráulica recuperou a produción de exercicios pasados, superando as baixas cifras de 2022”. Branco destaca que “a produción eléctrica por renovábeis case duplica o consumo interno galego”. Porén, expón que “desde o ano 2022, baixou moito o consumo, estando moi por debaixo das cifras tradicionais, como consecuencia da alza do prezo da electricidade e da paralización da actividade nunha parte da planta de Alcoa na Mariña, que é o principal consumidor, con diferenza, do país”. Almacenamento para a transición enerxética O consumo de electricidade na Galiza no primeiro trimestre de 2023 colocouse en 3.524.306 MW/h, o que representa 55,9% do total da produción renovábel galega. Neste sentido, aséntase a tendencia da suficiencia eléctrica do país en base ás enerxías limpas e aos avances en materia de descarbonización, que o sitúan á cabeza do proceso de transición enerxética no Estado. A produción de orixe renovábel vén superando as necesidades de consumo eléctrico da Galiza desde 2020. No primeiro trimestre de 2022, cunha caída moi importante da xeración mediante tecnoloxías limpas, a produción con renovábeis sumou 7,8% máis que as necesidades de consumo. Así, continuouse coa liña comezada en 2020 e 2021, cando a electricidade de fontes renovábeis superou o consumo interno en 26% e 15,6%, respectivamente. A xeración renovábel Os datos de xeración renovábel da Galiza cobren os obxectivos de produción fixados polas autoridades estatais e comunitarios. Aínda así, neste momento atópanse en tramitación outros 17.550 MW de enerxía eólica, cuxa entrada en funcionamento implicaría cuadriplicar a capacidade de produción eléctrica do país. Un total de 11.223 MW están destinados a eólica terrestre e 6.327 MW a eólica mariña nas augas galegas, cunha capacidade que duplica a prevista polo Ministerio de Transición Ecolóxica (Miteco) para todo o Estado "Unha vez cubertos os obxectivos de xeración renovábel marcados polo Estado para Galiza cómpre seguir desenvolvendo proxectos neste ámbito, pero analizando o seu retorno social para o país porque as instalacións eólicas levantadas nas últimas décadas non teñen xerado ningún beneficio social”, defende Branco. Galiza exportou no primeiro trimestre deste ano 3.993.056 MW/h de electricidade, 51,9% do total xerado na Galiza. O principal destino é Madrid, que no mesmo período consumiu 7.556.025 MW/h, dos cales só xerou 239.612 MW/h. Neste caso, só 102.739 MW/h son de orixe renovábel. Madrid é a única comunidade do Estado que non conta con ningunha instalación eólica e que non xera electricidade procedente do vento. Esta situación é resultado da especialización produtiva interna no espazo estatal. A taxa galega de xeración eléctrica con fontes solar e eólica sextuplica o índice mundial Ao longo de 2022, Galiza exportou o 40,5% do total da electricidade xerada no país. As cifras situáronse por riba das últimas anualidades, chegando a 28,1% en 2021, a 31,8% en 2020, a 25% en 2019 e a 35% en 2018. Nos exercicios ordinarios en que a planta de Alcoa de Cervo se atopou a pleno funcionamento, a terceira parte da electricidade producida polas distintas tecnoloxías non se utilizan na Galiza, destinándose a outros territorios que consomen o produto final, sen cargar cos custos ambientais e sociais. As eléctricas obtiveron uns ingresos na Galiza de 750 millóns neste 2023 As compañías enerxéticas con actividade na Galiza obtiveron no primeiro trimestre de 2023 uns ingresos por xeración de electricidade de 750 millóns de euros. Segundo os datos do Operador do Mercado Ibérico de Enerxía (OMIE), o prezo medio da luz no mercado grosista nese período situouse en 97,5 euros megawatts a hora, alcanzando os valores máis elevados no mes de febreiro, cando chegou a 135,5 euros MW/h. A maior facturación conseguírona as compañías hidroeléctricas con 303,9 millóns de euros. Precisamente, os beneficios achegados pola electricidade de orixe hidráulica ás compañías enerxéticas son moi superiores aos de calquera outra tecnoloxía de xeración, cifrándose os seus custos medios de produción en 22,4 MW/h. Así as cousas, os encoros galegos achegaron ás eléctricas no primeiro trimestre de 2023 unhas ganancias aproximadas de 234,1 millóns de euros, como consecuencia do incremento da produción e do prezo da electricidade. Os beneficios obtidos polas compañías enerxéticas dos ríos galegos en 2022 situáronse en 755,6 millóns de euros. As ganancias desa anualidade foron inferiores en 66, 2 millóns de euros ás de 2021 pero situáronse por riba dos resultados dos pasados exercicios. Neste sentido, os encoros galegos achegaron ás empresas eléctricas beneficios de 310,4 millóns de euros en 2020, de 285,6 millóns de euros en 2019 e de 457,6 millóns de euros en 2018.