Os cambios na Tenreira Galega Suprema, entre o prexuízo e a homoxeneización

A aprobación no último pleno da Indicación Xeográfica Protexida (IXP) de Tenreira Galega-Vacún da Galiza dunha modificación na tipoloxía Suprema, a máxima -en calidade e prezo- deste Consello Regulador, abriu o debate sobre o proceso de manter ou non os animais en liberdade durante todo o proceso de crecemento. Segundo deu a coñecer o Sindicato Labrego Galego (SLG), con representación nesta IXP, un dos cambios propostos e aprobados pola maioría de participantes do grupo de traballo da Consello Regulador afectaría o sistema produtivo da Suprema e consistiría en que “os tenreiros que se sacrifiquen con oito ou máis meses deberanse estabular [encerrar nas cortes] e protexer de inclemencias climatolóxicas". A medida aprobouse co único voto en contra do SLG e co apoio dos representantes da industria, da Asociación Agraria Galega (Asaga), de Unións Agrarias (UUAA) e da Asociación de Gandeiros de Suprema. Prexuízo para a Suprema No mesmo pleno, o gandeiro e vogal do SLG na IXP, Samuel Formoso, presentou un texto alternativo que foi rexeitado no que se pedía a eliminación da obrigatoriedade de meter os animais en recintos fechados, co fin de protexer a cría en liberdade. En declaracións a Nós Diario asegura que con esta proposta “quedarán fóra centos de granxas co prexuízo que terá iso para a propia marca”. Explica que até agora convivían as explotacións “con becerros coas vacas en instalacións onde realizaban o cebo mais outros non tiñan e era en liberdade”. Por ese motivo entende que “o único que vai provocar é que sigan a desaparecer as granxas familiares que dan vida ao noso medio rural, privilexiando un modelo industrial”. As perdas da Tenreira Galega Suprema provocan outra tractorada en Lugo Desde a Federación Rural Galega (Fruga), o gandeiro e responsábel deste sector, Elías Somoza, sinala a Nós Diario que a modificación “só beneficia os cebadeiros e á grande industria”, ademais de que “a gran prexudicada será a tenreira galega suprema”. Opina que “a grande agroindustria está conseguindo os seus obxectivos coa complicidade da Consellaría e de gran parte das organizacións agrarias”. Somoza recoñece que a tenreira galega “non é uniforme con respecto aos seus métodos de produción”, mais, con esta mudanza, “vaise cara a un modelo moi selecto e reducido, con xatos estabulados até o final”. Desde a Fruga xa manifestaran o ano pasado o seu desacordo coa propia Consellaría do Medio Rural, en relación coa sinatura do protocolo da cadea de subministración para as explotacións de vacún carne adheridas a IXP Tenreira Galega. Daquela observaban “moita indefinición nas propostas” ademais de non ver clara “unha aposta pola marca”. Homoxeneizar a Suprema A proposta contou, entre outros, coa aprobación dunha parte da representación de gandeiras e dos gandeiros na IXP. É o caso da Asociación de Gandeiros de Suprema, que considera moi positiva a modificación. O seu presidente, Santiago Rego, asegura a Nós Diario que con esta medida “o que buscamos é tratar de sacarlles as escusas á industria da distribución, que di que non facemos unha suprema homoxénea”. Con esta afirmación, Rego defende o cambio normativo co obxectivo de restar argumentos que emprega a industria para reducir o que paga aos gandeiros pola suprema. A Fruga pide a execución das axudas para explotacións de tenreira galega Entende que esta tipoloxía de carne ten que seguir sendo, entre as catro existentes, “a principal”, e por este motivo buscaron “potenciar a finalización [da crianza] os dous últimos meses en interior”, co obxectivo de igualar o pesos dos animais, entre outras cualidades. En relación ás críticas recibidas considera que “non son certas” e en ningún caso “o selo pasará ás mans da industria e dos cebadeiros, seguirá a ser das explotacións”. Defende esta idea afirmando que “os animais serán nados, criados e sacrificados na propia explotación”. Ademais, reforza o seu discurso indicando que as granxas galegas tradicionais, “as de toda a vida. son aquelas onde os animais acceden aos pastos e logo recóllense despois” fronte ás que “fan un manexo en extensivo os 365 días do ano, algo que é falso”. Desde Unións Agrarias (UUAA), o seu responsábel de carne de vacún, Xosé Ramón González, tamén considera que “temos un problema na produción que non impide comercializar a carne a mellor prezo”. Aclara que teñen detectado nos grupos de traballo que “hai animais escasos de peso, de engraxamento, duros e con cor escura”. Esta situación, que indica que se atoparía en 0,1% da produción”, daríase por unha “deficiente alimentación e un exceso de musculación dos animais”. Por este motivo, entende que a maneira de evitalo “a única maneira é que etean acortellados e dispoñan de pouca superficie con comida alta en enerxía e proteínas”. Gandeiros convocan unha nova tractorada en Lugo para esta quinta feira Dentro do pleno, tamén a Asociación Agraria Galega votou a favor desta modificación. Esta entidade conta, no do sector da carne, con tres vocais na IXP que representan aos cebadoiros. O seu presidente, Francisco Bello, explica a Nós Diario que algo “básico” na Suprema é que os xatos estean “a maior parte do tempo en liberdade e sen ter que depender de pensos”. Porén, asegura que “sempre defendemos que se hai necesidade de finalizar o proceso, e para ter un rendemento mellor, fose con alimentos ecolóxicos e respectando todo o realizado con anterioridade”. Neste sentido, Bello cualifica dunha “anécdota” o tempo a empregar neste caso ademais se ser “sempre con alimentación controlada polas propias inspeccións da IXP”. Reformas nas explotacións para contar con instalacións Desde o SLG lembran que “no contexto actual de crise económica e climática existente, a produción en base á importación de insumos vai a ser inviábel economicamente para a maioría de pequenas e medianas granxas”. Entre os gastos que os vindeiros anos poderían aumentar nas explotacións estaría tamén “a construción de novas instalacións para ter o gando fechado en cuberto, que pasaría a ser algo obrigatorio”. Neste sentido, Elías Somoza (Fruga) considera que esta modificación na IXP "rachará a convivencia en base aos intereses económicos e comerciais da grande industria, con empresas nas que funciona algunha porta xiratoria entre os seus directivos". Axudas para o sector Sobre os posíbeis gastos nas explotacións, Santiago Rego fai un chamamento á Consellaría para que “habilite unha serie de axudas para acometer obras naquelas instalacións que non as teñan”. Neste sentido, apunta a que “aínda hai un período transitorio de dous anos unha vez a norma sexa aprobada pola UE”. Neste sentido, Xosé Ramón González (UUAA) asegura que nunha reunión co conselleiro de Medio Rural, José González, “díxonos que habería unha liña de axudas para todo este tipo de investimentos”.