A Comisión Europea calcula que a economía do Estado español medrará 1,4% en 2023, catro décimas por riba do 1% que auguraba no prognóstico do outono, mentres que a previsión de crecemento repunta até 2% para 2024.
En comparación coas previsións de novembro, o crecemento para 2022 foi superior nun punto porcentual, situándose en 5,5%.
Da mesma maneira, reduce a previsión da inflación española até 4,4% para o presente exercicio, catro décimas por baixo do descenso que Bruxelas auguraba en novembro para 2023, mentres que a cifra mantén unha previsión de redución de 2,3% para 2024.
Porén, a variación da inflación galega a finais de 2022 situábase 0,7 puntos por baixo da do Estado español. Así, cabería agardar que o crecemento prognosticado por Bruxelas para España non se consiga na Galiza.
Este dato sitúase, ademais, por baixo do prognóstico comunitario de inflación, que se prevé que descenda até 6,4% en toda a Unión Europea para 2023 (fronte á anterior previsión de 7%) e até 2,8% en 2024, tamén dúas décimas por baixo das previsións de novembro.
A UE esquiva 'por pouco' a recesión económica
As previsións de inverno da Comisión Europea evidenciaron hoxe que a Unión Europea (UE) salvou "por pouco" a recesión económica que auguraba o prognóstico do outono ao evitar a contracción do cuarto trimestre e logrando unha taxa de crecemento anual en 2022 de 3,5% tanto na UE como na zona do euro, e deixando atrás un pico de inflación de 9,2%.
Non obstante, o Executivo comunitario advertiu que a economía da UE aínda ten retos por diante, como inflación subxacente, que seguiu aumentando en xaneiro, ao tempo que consumidores e empresas aínda teñen que facer fronte aos elevados custos da enerxía.
