Os prezos da alimentación nos supermercados aumentaron 30% no último ano

Catro de cada dez alimentos analizados pola organización Facua-Consumidores en Acción encareceron por encima de 30% nun ano, o que pon de manifesto, segundo a asociación, a necesidade de que o Goberno estatal fixe prezos máximos en alimentos básicos. "Resulta evidente que a baixada do Imposto sobre o Valor Engadido (IVE) nalgúns produtos tivo un efecto extraordinariamente leve na cesta da compra dado o brutal encarecemento que se produciu no último ano", advertiu Facua. Despois de 24 meses de subas de prezos, o IPC incrementouse 13,6% na Galiza En concreto, a organización realizou un seguimento sobre a evolución de 507 prezos en nove cadeas de supermercados e hipermercados entre xaneiro de 2022 e o mesmo mes deste ano. Os nove supermercados e hipermercados obxecto do estudo foron Día, Hipercor, Alcampo, Aldi, Lidl, Eroski, Carrefour, El Jamón e Mas. A cadea Mercadona non se incluíu entre eles xa que esta empresa non publica catálogos de prezos. En termos globais, a suba media dos prezos no último ano nestes estabelecementos foi de 24,2%, porcentaxe que se eleva até 29,2% se a comparación se realiza tendo en conta os prezos con oferta que tivesen os produtos en xaneiro de 2022 e en xaneiro de 2023. Segundo a normativa, para mostrar un produto con oferta de redución de prezo debe figurar onda este o menor importe que se aplicou a produtos idénticos nos 30 días precedentes. A suba media máis alta, de 47,4%, produciuse na vintena de prezos de aceites analizados, seguidos do leite e os lácteos (49 produtos), que experimentaron un incremento de 34%. Pola súa parte, a carne e o peixe (cun total de 118 prezos analizados) encareceron 24,2%, mentres que os prezos das bebidas (44 produtos entre os que hai refrescos, zumes, augas, cervexas e outras bebidas alcohólicas) aumentaron 23,5%. Os prezos dos alimentos acumulan 38 meses de subas consecutivas Así mesmo, o prezo nos produtos de limpeza e hixiene persoal analizados (34) aumentou 19,3% no último ano, mentres que as froitas e verduras (74 prezos) fixérono en 17,7%, pola súa parte, pastas, legumes e arroces (27 produtos analizados), en 12,2%. Diferenzas co INE O estudo de Facua-Consumidores en Acción desvela importantes diferenzas entre os datos achegados sobre as nove cadeas de supermercados estudadas e os resultados publicados sobre o Índice de Prezos de Consumo (IPC) polo Instituto Nacional de Estatística (INE). Os prezos nos supermercados subiron por riba dos datos achegados polo INE Desta maneira, aínda á espera dos resultados de xaneiro de 2023 por parte do INE, mentres que a inflación dos aceites de oliva -a maioría dos analizados por Facua son desta clase- foi en 2022 de 35,2%, o resultado da organización aumenta esta taxa nos supermercados en 12,2 puntos porcentuais, até 47,4%. A suba de prezos publicada polo INE no 2022 foi para o leite de 37,2% e para os produtos lácteos estivo na contorna de 24%. Porén, os produtos analizados por Facua sinalan que as cadeas estudadas achegáronse de media ao limiar superior, cun incremento do custo de 34%. Caso similar para a suba das carnes e peixes. Mentres para o INE esta suba oscilou entre 7,1% para o peixe e 15,1% para a carne de ave, o estudo da asociación sinala unha media de incremento para estes produtos que supera ambas as categorías nas superficies comerciais estudadas, onde aumentou o custo en 24,2%. Tamén foron maiores as subas de prezo nas cadeas de supermercado nas bebidas en comparación cos datos do INE, chegando a dobrar a suba de custo. Así, o INE sinala un aumento dos prezos en 2022 nas bebidas non alcólicas de 12,4% e nas alcólicas de 9,6%. Porén, a organización de consumidoras e consumidores reportou para esta tipoloxía de produtos unha suba media de 23,5%. No caso dos produtos de coidado persoal, o instituto estatístico sinala unha suba de prezos en 2022 de 6,3%, mentres que os produtos analizados por Facua alcanzaron de media un incremento de 19,3%, máis do triplo. A suba de prezos na alimentación seguirá marcando o incremento da inflación As patacas encareceron de forma importante segundo o reporte do INE en 2022, en 21,6%. Non obstante, fixérono menos o resto de legumes e hortalizas (12,6%) e as froitas (7,3%). Estas dúas últimas taxas son amplamente superadas polo 17,7% de media nas froitas e verduras analizadas no estudo de Facua. Por último, a excepción vén marcada polas pastas e arroces, que mentres para o INE se incrementaron en 2022 en 19% -as pastas- e en 21,7% -os arroces-, no estudo de Facua marcan de media -aínda que incluíndo os legumes- unha suba de 12,2%. Das sete cadeas analizadas no estudo con representatividade na Galiza, e tendo en conta os prezos rebaixados tanto en xaneiro de 2022 como en xaneiro de 2023, Carrefour foi a cadea que máis incrementou de media os produtos, en 46,4%. Séguena Aldi (44,5%), Lidl (43,2%), Alcampo (29,5%), Eroski (23,7%), Dia (20,5%) e Hipercor (19,2%). Os incrementos non se trasladan aos produtores O sector lácteo, segundo o INE, experimentou unha suba de prezos de 37,2% para o leite, mentres que no caso dos produtos transformados o incremento estivo na contorna de 24%. Segundo Facua, que fai unha media ambos os tipos de produtos, a suba nas cadeas de supermercados analizadas é de 34%. Máis de 50% das explotacións lácteas galegas venden a perdas Porén, esta suba non se traduce aos importes recibidos polo sector produtor. Neste sentido, Unión Agrarias (UUAA) denunciou esta cuarta feira que polo menos 50% das explotacións gandeiras galegas seguen producindo leite "a perdas", a pesar de un lixeiro incremento do pago das industrias lácteas. O secretario xeral da organización, Roberto García, aclarou que "as explotacións por baixo dos 200.000 quilos cobran unha media de 43 ou 44 céntimos por litro", mentres que "as explotacións grandes, de máis dun millón de quilos, poden ter prezos por encima dos 60 céntimos". "Iso si, cando falamos de media dannos outras cifras, sobre 55 céntimos, e nesa media conviven as pequenas explotacións, con 10 céntimos menos", detallou o secretario xeral de UUAA, que lembrou que "a Galiza segue por baixo do prezo medio no Estado español e na Unión Europea (UE). Ao respecto, dixo, "non hai nada que xustifique baixadas no prezo para a nova etapa -de novos contratos coa industria-", advertiu Roberto García. Perda da produción gandeira A inmensa maioría dos contratos -entre produtores e industria- teríanse que renovar a principios de marzo, mais "as empresas están a ser remisas a mandar a proposta coa oferta económica con dous meses de antelación, como é a súa obriga", denunciou Roberto García, secretario xeral de UUAA, que advertiu que "a industria debe ser consciente de que hai unha caída permanente do número de gandarías" e de que "por primeira vez en moitos anos na Galiza, estes últimos meses, houbo unha caída na produción". Un de cada dous gandeiros galegos produce "a perdas"