71% da electricidade que produce Galiza xa é de fonte renovábel e exporta o 42%

Segundo os últimos datos publicados por Rede Eléctrica (provisionais até que se faga público o informe anual en primavera), as fontes renovábeis xeraron 71,2% da enerxía eléctrica producida na Galiza durante os tres primeiros trimestres de 2023. Ademais, 32,9% da electricidade xerada na Galiza (descontando a enerxía perdida no transporte) foi exportada a outras autonomías do Estado. Desta maneira, no país, entre xaneiro e outubro de 2023, tan só se consumiu 64,6% da electricidade producida no territorio (2,5% perdeuse no seu bombeo). A eólica foi a primeira tecnoloxía de xeración durante os tres primeiros trimestres de 2023, con 7.171.221 megawatts á hora (MWh), 39,5% dos 18.156.384 producidos durante o período. Séguea a hidráulica, con 5.309.157 MWh (29,2%). Entre eólica e hidráulica suman 68,7% da xeración total, practicamente a totalidade da renovábel, mentres que as fontes non renovábeis sumaron 28,8% do total. Case un terzo da xeración hidráulica a nivel estatal A Galiza sumou 16,3% de toda a xeración eólica de electricidade a nivel estatal, o que supón máis do triplo do peso territorial galego no conxunto do Estado español (5,9% da superficie). No caso da enerxía hidráulica, a xeración na Galiza durante o período supuxo practicamente un terzo de toda a produción estatal. Así, as centrais hidroeléctricas forneceron de 32,4% da enerxía desta tecnoloxía do conxunto do Estado durante os tres primeiros trimestres de 2023. 260 concellos galegos contan con centrais de xeración eléctrica de orixe renovábel A taxa de produción eléctrica renovábel galega (71,2%) ficou até 22 puntos porcentuais por riba da estatal (49,1%), que non chegou á metade do total entre xaneiro e outubro de 2023. Neste sentido, a Galiza produce 13,1% da electricidade estatal a partir de enerxías renovábeis. A diferenza entre a produción e o consumo de electricidade na Galiza contrasta cos datos referentes a outras autonomías do Estado español. Neste sentido, a Comunidade de Madrid importou até 96,3% da enerxía eléctrica que consumiu nos tres primeiros trimestres de 2023. Outros territorios do Estado tamén teñen unha forte dependencia de autonomías, como a galega, que producen moito máis do que precisan. Deste modo, Cantabria importou 79,3% da electricidade que consumiu entre xaneiro e outubro do ano pasado, Euskadi percibiu 69,2%, o País Valencià 43,3%, as Illes Balears 21,9%, Andalucía 16,2% e a Rexión de Murcia 2,9%. 62% da potencia eólica galega instalouse antes do ano 2005 Influencia do final do ano Os últimos meses do ano son máis proclives para a produción eléctrica galega xa que en condición normais dáse unha maior afluencia de vento e de chuvias. De feito, engadindo os datos referentes ao último trimestre do exercicio anterior, entre o 1 outubro de 2022 e o 30 de setembro de 2023 a Galiza exportou máis de 42% da electricidade. Catalunya é exportadora Ao contrario da Comunidade de Madrid, que se aproveita da produción de autonomías como a galega para poder soster a súa industria e o consumo da súa poboación a través da importación de 96,3% da electricidade que necesita, Catalunya xerou durante os tres primeiros trimestres do ano máis enerxía eléctrica da que consumiu. Desta maneira, a pesar de ser unha das maiores potencias industriais, económicas e demográficas do Estado, Catalunya exportou 6,5% da electricidade que produciu. Porén, ao contrario que no caso galego, é moi dependente das enerxías non renovábeis, a través das que xerou 85% da enerxía eléctrica. Tan só a nuclear supuxo 59% do total de MWh da produción catalá. 42,5% do consumo de enerxía debe ser de orixe renovábel para 2030, un obxectivo que Galiza supera desde 2020 Estremadura e a nuclear Estremadura exporta até 76,5% da electricidade que produce e xera 426% da que consome. Porén, os datos estremeños, ao contrario dos de territorios como o galego que se basean nun modelo de produción renovábel, dependen, como no caso catalán, da enerxía nuclear. Desta maneira, até 53,1% da enerxía total que produce Estremadura provén desta tecnoloxía. O equilibrio de Canarias A condición ultraperiférica de Canarias obriga esta autonomía a producir a electricidade que precisa, sendo un caso que proba que un territorio pode condicionar a súa xeración eléctrica en función das súas necesidades. Así, Canarias produciu nos tres primeiros trimestres un total de 7.286.355 MWh, tan só 66 máis dos 7.286.289 que demandou. Este fenómeno de autoabastecemento tamén se dá nas cidades autónomas de Ceuta e Melilla, aínda que neste caso aproveitando case na totalidade da produción os combustíbeis fósiles. Madrid xera 3,4% do que consome En termos de produción sobre demanda, a Galiza xerou 171,4% da electricidade que consumiu entre outubro de 2022 e setembro de 2023. Unha ratio inversa á rexistrada na Comunidade de Madrid, que tan só produciu 3,4% do seu consumo total no mesmo período. Así, na Galiza producíronse 2712,4 MWh de enerxía eléctrica por cada 100 xerados na Comunidade de Madrid. Pola súa parte, a autonomía madrileña tivo un consumo de 187,6 MWh por cada 100 dos que foron empregados na galega.