Malingre marca

AFundición Malingre marcou a vida de Ourense durante algo máis dun século e son varias as xeracións de Malingres, desde o inicio da empresa por Manuel Malingre Parmentier, un belga que estabelece a primeira fundición, en 1864, até o feche definitivo en 1979, polo falecemento do empresario Manuel Malingre Lamas. Quizais a intención do fundador, que xa viña da fábrica de Trubia en Asturias, fose aspirar á fundición dos raís do ferrocarril Zamora-Ourense, que con tanto atraso se achegaba á Galiza, pero xa dese o principio fundíronse potes e potas, un produto que os Malingre nunca deixaron de fabricar. Marcaron a vida da cidade de Ourense, constitúen todo un capítulo da historia industrial do noso país, pero hoxe veñen a esta sección pola comunicación gráfica que se conserva, sobre todo destas pezas que aquí mostramos, que denotan xa un interese empresarial pola identidade corporativa e por suposto pola comunicación dos seus produtos. Debo a Ana Malingre Rodríguez os datos que achego, recollidos na súa magnífica tese de doutoramento na Universidade de Vigo, e ao seu arquivo persoal remito estas imaxes, unha selección de follas de man publicadas pola empresa. Aínda que temos que lamentar con Ana a perda dun catálogo da empresa, quizais editado a principios do século XX por Manuel Malingre Ludeña, que facía inventario dos seus produtos e dos seus modelos, tal como se reseñaba na capa do mesmo: "Balcones, columnas y balaustres para escaleras, columnas para edificios, cocinas tipo Bilbao y centrales, pies de banco para jardines, maineles, puertas de hierro dulce, mesas para café, potes y potas". O díptico dos potes e potas que aquí se mostra, coa súa fasquía vangardista, pertence á terceira época, como todos os demais aquí reproducidos, pero mostra aínda o símbolo gráfico coas iniciais de Manuel Malingre Ludeña, que falece en 1930, aínda que tivo que ser impreso —e deseñado— despois de 1936, porque no seu pé de imprenta figura a Imprenta Industrial de Bilbao, que sabemos fundada nese ano. O deseño da peza utiliza algúns recursos da vangarda gráfica que se desenvolve nos anos trinta, revira textos e foto nunha disposición oblicua que procura dinamismo e emprega o alto contraste do negro e o vermello. As perspectivas fotográficas dos diferentes tamaños dos potes e potas contribúen aínda máis á forza expansiva. Case seguro que foi deseñado na mesma imprenta, como todos os demais desta colección. A Imprenta Industrial é a que asina todas as follas e dípticos, agás o amarelo das cociñas, impreso en Barcelona por Seix y Barral Hnos. Pero o que máis chama á atención é o uso sistemático, nos produtos fundidos e nos folletos de promoción, do símbolo gráfico da empresa, o dobre 'M' enmarcado nun círculo, que comeza a súa vida nos anos corenta e contribúe á forte identidade que proxecta a empresa de Manuel Malingre Lamas, tío avó de Ana Malingre, que é tamén tataraneta de Lamas Carbajal.

Malingre marca

Luz en La Noche

Falar aos ollos

Paisaxe gasosa

Cartas explosivas

Un punto colorido

A arte de escribir

As pedras que falan

Prensado e ben presentado