Volve a Liga Galega de Fútbol Gaélico

Esta fin de semana volve a III Liga Galega de Fútbol Gaélico. A categoría masculina será a primeira en comezar cunha xornada inicial este domingo 8 de outubro cos encontros entre o Estrela Gaels e o Auriense FG na comarca de Ordes (campo de Aguas Santas, Chaián, Trazo, 18.30 horas) máis o partido entre Lume de Beltane-Independiente e o Keltoi Vigo “A” na comarca de Pontevedra (campo da Reboia, Poio, 20 horas). A competición estará formada por nove equipos: Auriense FG, Estrela Gaels, Estrela Vermelha, Fillos de Breogán, Keltoi Estibadores “B”, Keltoi Vigo “A”, Lorchos Gaélicos do Barbanza, Lume de Beltane-Independiente FG e Turonia GFG. Muiñeira galaico-irlandesa e parabéns á Galiza nun Día da Patria vivido desde Derry O formato da liga, explican desde a Asociación Galega de Fútbol Gaélico (AGFG), será de volta única. con dúas semifinais, tamén partido único, no que o locatario é o equipo que mellor resultado tivo na fase regular. Logo na gran final decidirase o novo campión masculino galego. No caso dos equipos clasificados do 5 ao 9 na volta única, xogarán eliminatorias para decidir o campión do título 'shield'. O vicepresidente da AGFG, Miguel Otero, explica a Nós Diario que en relación ao número de equipos, esta tempada “mantense” ao xurdir filiais -caso do Estrela Gaels- que compensaron as baixas de formacións que non conseguiron deportistas abondo para participar. “Contan coas achegas das Gaélico Escolas que se forneceron de canteira e, como novidade, temos a participación dun conxunto do Barbanza, os Lorchos Gaélicos”, sinala. Primeira xornada Otero tamén forma parte do Keltoi de Vigo, un dos equipos que abre a primeira xornada. Considera que é un dos partidos “que temos que gañar se queremos optar polo campionato”. Entende que nesta liga “non podes ter erros que che penalicen ao non conseguir ser locatario para as semifinais e a final nunha competición coa tanta igualdade como a nosa”. Malia saír como favoritos, desde Vigo desconfían da "nova xeración de xogadores que achegan á competición ligueira galega". A Irmandiña de gaélico apura a súa estrea nos World Games Desde o Ourense Gaels, a súa presidenta, Laura Vázquez, afirma a Nós Diario que para este partido de inicio da liga "vémonos con posibilidades de gañar neste primeiro encontro de liga contra Estrela Gaels, xa que nesta pretempada contamos con novas incorporacións no equipo masculino, que se estrearán neste partido”. A Liga feminina Para o inicio da liga feminina de fútbol gaélico haberá que agardar dúas semanas. A razón, segundo explican desde a AGFG, é a realización na Haia (Países Baixos) do Paneuropeo a fin de semana anterior. O primeiro encontro será en Ourense e decorrerá a fin de semana do 21 e 22 de outubro. Nel competirán o equipo da cidade das Burgas contra o santiagués Estrela Vermelha. Estará formada por seis conxuntos: Fillas de Breogán, Auriense, Independente, Turonia, Estrela Vermella e Grovias FG. Este último equipo é de nova formación e, despois duns anos complicados, conseguiu esta tempada un estado óptimo para poder participar. O seu formato será ida e volta, onde o equipo máis regular levantará o trofeo de campioas da Galiza que a tempada pasada recaeu nas xogadoras do Turonia GFC. A selección galega de fútbol gaélico disputará o Mundial no mes de xullo Iniciativas para medrar “Na Galiza, neste deporte, sobre todo fóra das grandes cidades, é difícil moitas veces manter os equipos no tempo”, pensa Otero, “por este motivo precísase unha importante renovación, que entre xuventude”, engade. Neste sentido, a entidade confía nos proxectos que xa están funcionando, como é o caso das Galaico Escolas “que atraen xogadoras e xogadoras para conseguir unha nova xeración que practique este deporte”. Porén, a entidade que xestiona o fútbol gaélico na Galiza non esquece a participación de deportistas de máis idade que foron o xermolo desta disciplina no país. “Un dos proxectos que poderían comezar esta tempada e no que estamos traballando sería a creación dunha nova liga máster e atraer participantes que perdemos nos últimos anos que non desexen ter tantos partidos”, asegura a Nós Diario o responsábel da AGFG. O mellor fútbol gaélico de Europa competirá esta fin de semana na Coruña Como parte da promoción e mellora deste deporte, ademais, a entidade comunicou que o vindeiro 14 de outubro terá lugar en Boqueixón (comarca de Compostela) unha nova edición do curso 'foundation', o primeiro dos niveis para adestradoras e adestradores deste deporte. A iniciativa terá continuidade con outros cursos para introducir novos perfís necesarios en varios ámbitos do fútbol gaélico na Galiza.