Picusa Academy, a proposta galega para potenciar a canteira ciclista de competición

Este 2023 remata cunha boa nova para o ciclismo galego. O Grupo Deportivo Cortizo anunciou que lanzará ás estradas un novo equipo na categoría júnior, con vocación internacional, contando coa canteira do país e con deportistas de Portugal e do Estado español. Con sede na localidade do Porriño (comarca de Vigo), iniciará a súa andaina con oito corredores, tendo sempre como prioridade a formación de ciclistas galegos. O novo equipo levará o nome de Picusa Academy, pondo en valor o patrocinador da iniciativa e a idea de que sexa toda unha academia de novos valores sobre as dúas rodas para a Galiza. O equipo ten a intención de participar na que será a súa primeira tempada nas mellores carreiras do calendario galego, estatal e internacional facendo inclusións tamén no calendario doutros países. Entre as persoas responsábeis deste novo proxecto ciclista figuran o padronés Sabino García, que foi presidente da Federación Galega de Ciclismo en 2006, e na dirección técnica o porriñés Djamel Avendaño Campos, unha figura con moita proxección neste deporte procedente do Vigo-Rías Baixas. Gustavo César Veloso: "O meu maior triunfo foi a xeral da Volta a Catalunya" Inicio en Valencia e continuidade en Europa En declaracións a Nós Diario, Djamel Avendaño afirma que desde o punto de vista deportivo afrontan este novo proxecto “con moita ilusión e con ganas de demostrar nas estradas o potencial de todo o equipo”. Por este motivo indica que levan “varios meses traballando e estamos desexando empezar a tempada”. O proxecto presentarase oficialmente a principios de 2024, debido aos compromisos que teñen a maior parte dos corredores até fin de ano, e comezará a rodar polas estradas competindo primeiro no País Valencià no vindeiro mes de febreiro. A proposta da formación ciclista é ambiciosa e aseguran que procurarán realizar todo o calendario de probas da Copa de España. Polo de agora teñen xa, ademais, confirmadas as participacións en competicións de Francia e Portugal á espera tamén de anunciar a posibilidade de correr en Bélxica. Equipo inicial con visión de futuro “O noso obxectivo principal é impulsar o talento de mozos ciclistas, a través dun calendario completo e ambicioso, onde trataremos de medirnos cos mellores a nivel nacional e internacional”, asegura Djamel Avendaño. A idea do Picusa Academy é potenciar o talento galego e incorporar, no futuro, máis ciclistas do país. De inicio xa confirmaron a participación do vigués de Teis Lois de Jesús, un corredor que ten no seu historial un quinto posto na Ruta Albariño, o trofeo Montes do Roseira e dúas etapas da Challenge Rías Baixas. A Galiza perde o seu único equipo ciclista UCI O deportista galego estará acompañado polos valencianos Enrique Maranchón, campión de España cadete de fondo na estrada, campión de España contra o reloxo individual e situado este ano como gañador en 33% das carreiras; Éric Igual, campión de España cadete de 500 metros, récord estatal e seleccionado para os Xogos Europeos da Mocidade; Héctor Domínguez, subcampión de España de persecución individual júnior, subcampión estatal de persecución olímpica júnior e seleccionado para o Europeo e o Mundial júnior de pista; Asier Ortega, segundo Xeral Challenge Valencia Ou17, e Héctor Celda, segundo na Clásica de Sant Boi Junior, en Catalunya, e terceiro na etapa da Bizkaiko Itzulia Júnior, en Euskal Herria. A participación portuguesa correrá a cargo de José Salgueiro, campión de Portugal cadete de fondo na estrada e vencedor da Copa de Portugal cadete de estrada, ademais de estar seleccionado tamén para os Xogos Europeos da Mocidade. O equipo xa adestra polas estradas galegas Aínda sen contar con todo o conxunto de corredores na Galiza, Nós Diario tivo ocasión de falar cun dos poucos compoñentes do equipo que xa están adestrando de cara á estrea de 2024. O xa ciclista do Picusa Academy Diego López é un deles e está impaciente por comezar a rodar en competición. Campión da Copa da Galiza do Porvir, segundo no Campionato galego de ruta e terceiro no Campionato galego de crono, este navarro afincado na Galiza asegura que agora mesmo ten “moitas ganas e ilusión de afrontar esta tempada”. O corredor indica que desde que lle comunicaron a súa incorporación ao Picusa Academy séntese "moi motivado", "e sobre todo agradecido da grande oportunidade que me deron de formar parte dun equipo con tanto potencial e onde se traballa con tanta seriedade". En relación á iniciativa deportiva que comezará en 2024, o deportista ten confianza no grupo que se formou no Porriño e en que "xuntos imos poder conseguir grandes cousas” dentro do ciclismo júnior. Coa presentación en público aínda pendente de realizar, o equipo informou que contará con roupa de competición deseñada para a ocasión por Gsport e empregará para as competicións oficiais bicicletas Factor.