Fin á carreira de Agustín Marchesín en Vigo. O gardameta arxentino desvinculouse esta cuarta feira do Real Club Celta, algo que xa era un segredo a voces nos últimos días, tras o acordo alcanzado entre club e xogador. "Marchesín, chegado en agosto de 2022, e a pesar dos desafíos, converteuse nunha figura valiosa para o Celta durante o seu tempo no equipo", salientan desde A Sede.
Aínda que unha lesión no tendón de Aquiles obrigou o porteiro a afastarse dos terreos de xogo durante dez meses, "a súa dedicación quedou demostrada nos seis partidos disputados en 2023", subliña o equipo presidido por Marián Mouriño.
O club agradécelle "o seu esforzo, dedicación e profesionalidade" e deséxalle "o maior dos éxitos" na súa nova etapa deportiva no Gremio brasileiro, que xa confirmou a súa chegada en calidade de axente libre.
Rafa Benítez afrontará o que resta de tempada con dos xogadores para defender a meta celtiña do primeiro equipo, Vicente Guaita e Iván Villar, e poderá contar tamén cos porteiros do Fortuna Coke Carrillo, Ruly García e César Fernández.
