O rugby inclusivo chega a Compostela coa ollada posta nunha liga

O rugby inclusivo está a medrar na Galiza. A experiencia do segundo equipo mixto do país deste deporte, Tuxeleires, no que participan deportistas con e sen discapacidade, comezou no campo de xogo o ano pasado cando se estrearon diante do Crat Sharks, formación vencellada ao Club de Rugby da Coruña. Daquela tivo lugar o primeiro encontro da historia nesta modalidade na Galiza e este sábado será a estrea para a capital galega (campo de rugby da USC, 12 horas). O equipo picheleiro xurdiu en xullo de 2022 despois de que varias adestradoras e adestradores aceptaran a proposta dunha entidade social de realizar unha actividade deportiva e de lecer en Compostela. Tiñan en común o rugby e decidiron empregar este deporte para mellorar a contorna social das persoas que se apuntaran. O educador social vasco Xabier Vidal, membro do grupo promotor no que tamén había monitoras e monitores, explica a Nós Diario que deinicio decatáronse que “as persoas con discapacidade non teñen participación no ocio comunitario” e tampouco había posibilidade algunha de “lecer inclusivo na contorna compostelá”. A fórmula medrou en pouco tempo ao contactar con máis entidades e chegaron a reunir 50 persoas para formar un equipo. “O proxecto contou co apoio do Centro Don Bosco e centramos a actividade en persoas maiores de 16 anos, mulleres e homes, con ou sen discapacidade”, indica Vidal. A orixinalidade deste equipo, apunta este deportista, procede de “fuxir de contar só con persoas con discapacidade e alimentar unha actividade deportiva inclusiva e igualitaria”. Joaquín Maguna, adestrador do Vigo Rugby Club: "O rugby transmite valores de respecto e traballo" Procurar a inclusión “A xestión deste equipo é a mesma que a de calquera outro”, indica Vidal, “a xente ten moitos prexuízos mais a realidade é que non tivemos que adaptar nada”, engade. Contan tamén co coñecido como “terceiro tempo” que realizan nas instalacións que a asociación Don Bosco ten no barrio de San Pedro da capital galega. A iniciativa é a primeira en concretarse sen ter unha entidade deportiva como apoio. “Partimos desde cero, algo que non é moi común pois o habitual neste caso sería partir dun club xa creado”, asegura o coordinador do proxecto. A idea vaise espallar nos vindeiros meses poderían darse a coñecer novos equipos, como os que se están preparando en Vigo, Viveiro, Lalín e Ourense. “A xente está moi animada e quere participar”, conclúe Vidal. Tuxeleires aproveitou que en 2023 se aprobaron as licenzas de rugby inclusivo na federación galega “cun prezos moi económicos” para formar parte da familia deste deporte. O modelo que adoptaron é o denominado Mixed Ability (capacidade mixta), unha proposta internacional que non está centrada só en gañar, senón en desenvolver e pór en práctica as habilidades das persoas con maior necesidade de apoio. Aurelio de Tena, presidente do CRAT: "O sénior masculino podería xogar na Estatal no futuro" Experiencia positiva O equipo compostelán de Tuxeleires conta con deportistas con e sen experiencia, mulleres e homes que teñen algunha discapacidade ou ningunha. Neste último caso está Fátima Rodríguez que, con 26 anos e algunha experiencia en natación, decidiu probar hai uns meses co rugby inclusivo e xa forma parte do conxunto. “Coñecín o proxecto por casualidade e polo de agora levo poucos adestramentos mais a experiencia está a ser moi boa e gratificante”, explica a Nós Diario. As sesións onde se reúne todo o equipo comezan cunha parte de quecemento “igual para todo o mundo” para pasar logo a realizar varios exercicios “e rematar no campo cun simulacro de partido”. No caso de Fátima comezou de cero para entender “os mínimos conceptos do rugby e as súas regras” mais foille doado por sentirse “moi acollida en todo momento”. Comparte a idea do "bo ambiente" que hai no proxecto "onde cada vez hai máis participantes e máis ilusión para que haxa máis partidos". Neste sentido, formula o desexo de que medren outros proxectos semellantes "para demostrar que é un deporte como o resto". Outro membro do equipo é Fernando Gulías, un xogador con moita experiencia, que se despraza cada semana até Compostela para participar no Tuxeleires. "Teño unha discapacidade de 39% e entrei en contacto con este deporte por consello médico", comenta a Nós Diario. Leva varios anos no Pontevedra Rugby Club e animouse a entrar neste novo proxecto "para contar con máis minutos de xogo, algo que non podía ter no outro equipo". Alicia San Martín: "O profesionalismo no rugby feminino é unha entelequia" Aspira a ser capitan de Tuxeleires e admite que a experiencia que está a ter con esta iniciativa "é moi boa e participativa, teño máis tempo a bola que é o que me gusta", admite. Coincide con Fátima e Xabier no interesante que sería poder deseñar unha liga ou torneo propios nos que entrara o rugby inclusivo. "precisamos que se difunda o que facemos, é un primeiro paso para que poidamos medrar", conclúe.