Chega o Dépor-Celta Fortuna nunha xornada crucial para os equipos galegos

Esta fin de semana, sen clásico mais co atractivo Dépor-Celta Fortuna de Primeira RFEF, o fútbol galego comeza a asentarse nas diferentes clasificacións das máximas categorías. Comezando pola Primeira, o Celta chega á novena xornada da Liga coa necesidade imperiosa de sumar este domingo os tres puntos na casa nun Balaídos que se lle resiste. A derrota nas Palmas reabriu o debate do que lle está a acontecer ao equipo nos últimos minutos dos encontros e mesmo comezou un ruxe-ruxe de que o club anda á procura dun substituto para Rafa Benítez se continúan os malos resultados. Leva Carlos Mouriño anos tentando vender o Celta? O técnico celeste, pola súa parte, continuou esta semana en Mos cos adestramentos coa vista posta no Xetafe (Balaídos, 18.30 horas). A previsión é que continúe co seu esquema habitual que, malia os resultados, demostrou asentar ao equipo no terreo de xogo. Os que parecen seguros para o choque son Iván Villar, Óscar Mingueza, Unai Núñez, Bamba, Betrán, Iago Aspas, Larsen, Starfelt e Luca da Torre. As dúbidas virían no posto de lateral esquerdo entre Ristic e Manu Sánchez ademais do centro do campo en disputa entre Aidoo e Carlos Domínguez. En Segunda, a xornada ligueira complicouse para o único equipo galego da categoría: o Rácing de Ferrol. Os verdes celebraron esta pasada quinta feira na Malata o 104º aniversario do club cunha vitoria traballada ante o Amorebieta e queda noveno na clasificación. Sen tempo para moito descanso, o equipo de Cristóbal Parralo volverá este domingo a xogar na casa contra o Cartaxena (18.30 horas). O encontro contra o fechacancelas da categoría que só conseguiu no que vai de competición unha vitoria e un empate podería ser unha oportunidade para achegarse aos postos de ascenso. O Celta buscará contra o Alavés en Balaídos rachar coa dinámica de derrotas na casa A Primeira RFEF En relación á Primeira RFEF, unha das novidades é o acordo para que a TVG retransmita os partidos que os equipos galegos desta categoría xoguen na casa. A estrea será este domingo co choque entre o Dépor e o Celta Fortuna (Riazor, 19 horas). Na Coruña afrontan o partido como un clásico. Lucas Pérez admitía en rolda de prensa esta semana que "é contra o Celta e sabemos a importancia que ten, pero xa non para a cidade, senón tamén para nós, para que esas sensacións que estamos a sentir se reflictan dunha vez cunha vitoria e aparte en casa, que non puidemos gañar e necesitámolo". Porén, asume con normalidade xogar ante o filial céltico porque "non se pode levar doutra maneira. Estamos nesta categoría”. O seu técnico, Imanol Idiakez, coincidía con esta idea na súa comparecencia onte en Riazor. "Gañar sería un punto de inflexión para todos", admitía. O Racing ascende a Segunda mentres Dépor e Celta B xogarán a promoción O Lugo pola súa parte, visitará Nafarroa o domingo para xogar co Osasuna Promesas (Taxoare, 20 horas). Onte, o técnico lucense, Pedro Munitis, analizaba o encontro e anterior derrota ante o Nàstic no Ángel Carro. “Deixounos boas sensacións mais faltounos baixar o ritmo de ansiedade”, aseguraba. Sobre o equipo local, o adestrador recoñecía que era “moi físico, con xogadores de moita envergadura”. Porén, avisaba que “se estamos ao noso nivel somos capaces de calquera cousa”. O primeiro encontro dun equipo galego nesta categoría será o que xogue este sábado o Arenteiro en Teruel (Estadio de Pinilla, 19 horas). Os do Carballiño, tras o empate ante o Tarazona no Espiñedo, terán outra oportunidade de abandonar os postos de descenso ante un rival directo. O seu técnico, Javi Rey, recoñecía ao final do partido que “non foi o noso mellor encontro, hai que ser realistas”. Porén, o optimsmo continúa no vestiario malia a situación na táboa que os une cos outros clubs que ascenderon esta tempada: Tarazona, Sestao River e Teruel. Balaídos e Riazor como sedes do Mundial 2030 Alén do deportivo, mais relacionado co fútbol na Galiza, está o recente anuncio da Federación Internacional de Asociacións de Fútbol (FIFA) sobre o Mundial de 2030. A decisión de que decorrerá entre Portugal, o Estado español e Marrocos -cunha primeira rolda en Arxentina, Uruguai e Paraguai- abriu de novo o debate das posíbeis sedes na Galiza. Balaídos, en Vigo, e Riazor, na Coruña semella que aínda terían moitas menos posibilidades tras o reparto de partidos entre todos os países que acollerán esa edición. Irene Ferreras viaxa a Logroño cun Dépor moi ambicioso: "Estou aquí para conseguir o ascenso" Ningún dos dous campos galegos cumpre o principal requisito de saída da RFEF que é contar con capacidade para reunir 45.000 persoas aínda que se acometeron obras. Neste sentido comezan a chegar críticas polos grandes custos que implican. No caso do campo do Celta, agora ten capacidade para 29.000 e a previsión, ao remate das obras que está a realizar o Concello de Vigo, era chegar aos 41.900 empregando bancadas supletorias. A obra chegaría, ao remate, aos 50 millóns de euros. Na Coruña, o estadio ten agora 32.490 asentos e o actual Goberno municipal presentou un proxecto para aumentar a capacidade até 45.000 mais o seu custo é de 60 millóns de euros. A decisión tomarase en 2026 e daquela saberase se a Galiza acollerá algún partido deste evento internacional.