O boxeo galego deixa K.O. os prexuízos e suma máis de 6.000 licenzas

O boxeo está a ter un enorme pulo na Galiza. Á día de hoxe, non é estraño, nin rechamante, coñecer algunha persoa que o practique. Os distintos ximnasios notan un forte aumento na demanda de prazas para comezar a aprender os miolos deste deporte cada día máis afamado no noso país. A Federación Galega de Boxeo tamén sente ese incremento de deportistas nesta disciplina. Actualmente, esta organización conta cun total de 6.345 persoas con licenza. Un número que se espera que nos próximos anos siga medrando. A verdadeira cuestión é: por que o boxeo está gañando de súpeto tanta popularidade na Galiza? Amaro Xesús Núñez Fernández, xestor do Club Equilátero Boxeo de Compostela, asevera que ese ascenso débese a varios factores. Un deles é o traballo de todos os clubs e da propia federación, xa que agora xéranse máis campionatos e torneos. E tamén está o factor das redes sociais. "A rapazada que vén adestrar fai deporte e logo comparten fotos e vídeos no ximnasio. Isto outórgalle ao boxeo visibilidade, e sempre axuda moito". "Ademais, de maneira indirecta, eventos organizados por creadores de contido como, por exemplo Ibai Llanos, fai que o boxeo chegue a un público que, ao mellor, antes non tiña en mente facer boxeo. Isto provocou a normalización desta arte marcial e beneficiou o deporte. Fixéronlle unha publicidade realmente boa a esta disciplina", considera o responsábel do Club Equilátero. A escritora lucense María Reimóndez, colaboradora de Nós Diario, practica boxeo desde hai case sete anos e asegura que "todos os deportes están moi masculinizados e o boxeo ten unha serie de prexuízos que se lle apoñen socialmente por asociarse á marxinalidade. Iso fai que as mulleres cheguemos a el moi tardiamente. Mais, para min é un espazo de seguridade no que estou moi a gusto. A literatura paréceme un espazo moito máis hostil", revela. Precisamente, o boxeo é un dos protagonistas de Furia, novela que lle deu a Reimóndez Premio o Premio Jules Verne de Literatura Xuvenil 2023 e que saíu á venda o pasado mes de outubro. No libro, a escritora mostra como o boxeo pode chegar a ser un espazo de socialización moi importante para as adolescentes: "Grazas ao boxeo, as rapazas novas atopan unha disciplina e un respecto. É un espazo para atoparte a ti mesma e a outras persoas, xa que neste deporte nunca estás soa, existe unha comunidade". María Reimóndez, a púxil do feminismo Visibilidade fronte ao descoñecemento "Seguimos sen poder ver boxeo na televisión. Ese aspecto está moi desatendido", lamenta Reimóndez, que explica que a súa intención con Furia era, entre outras cuestións, "apoiar esa comunidade á que pertence" e fai fincapé en que o boxeo "merece ter presenza na literatura e en moitos ámbitos". Jose Luis Álvarez, traballador do Boxing Club Cidade de Lugo, tamén acredita o éxito que está a vivir o boxeo. Pon de manifesto que no seu estabelecemento, 279 persoas practican a disciplina e atribúe o estalido deste deporte na Galiza a que "a maioría da xente está a ver que non é o que se pensaba até hai pouco tempo. Aínda hai persoas que teñen moitos prexuízos, mais parece que cada vez quedan menos. O boxeo é un deporte que acaba atraendo e gustando". Sempre existiron unha gran cantidade de prexuízos arredor do boxeo. Desde hai tempo, todas as ideas preestabelecidas que había sobre este deporte están desaparecendo a medida que a sociedade se atopa máis informada. Silvestre Gómez, gañador do último Campionato Estatal de Clubs, afirma que "o boxeo axuda en todo, tanto a nivel físico como mental; apórtache máis disciplina e mellora a concentración". Lembra que "sempre estivo asociado á violencia e aos matóns, mais non ten nada que ver e, de feito, é todo o contrario". Silvestre Gómez, boxeador: "Gústame enfrontarme con rivais que son máis grandes ca min" Amaro Xesús Núñez concorda con el e, na mesma liña, asegura que "por desgraza, existen moitos prexuízos, pero aos poucos vanse reducindo esas barreiras". "Ao final, o boxeo é unha arte marcial como o karate ou o judo. Todo se trata de traballar en equipo. O boxeo ensina constancia, sacrificio, compañeirismo e a aprender a vivir coa frustración". Un deporte para homes e para mulleres José Luis Álvarez sinala que, neste momento, no seu local case un 40% das persoas que practican boxeo son mulleres e un 60% homes. "Cando comezamos en 2002 non se apuntara ningunha muller ás nosas clases de boxeo. En 2009, había unha ou dúas como moito adestrando e, agora, hai moitas máis", afirma. Desde a súa posición de boxeador profesional, Silvestre Gómez nega que esta arte marcial sexa exclusivamente para homes, "o boxeo é para todos e para todas. Non ten xénero. Ningún deporte debería telo". A situación que está a vivir este deporte non é casualidade, pois hai un traballo por parte dos clubs e da federación. A organización de veladas e torneos dá visibilidade e pulo á disciplina. Aínda así, coinciden: "Queda moito por facer".