O BM O Porriño, a 120 minutos de tocar o ceo na súa primeira aventura continental

O final de tempada chega ao Porriño con dous títulos en xogo e unha exixencia física moi alta. O conxunto dirixido por Ismael Martínez afronta este sábado a ida da final da EHF European Cup logo de caer a pasada cuarta feira na ida dos cuartos de final do play-off pola Liga (32-21) ante o Elx Sobre este mes no que as galegas se xogan todo, sen apenas descanso, o técnico apunta: "Tentaremos levalo como o fixemos durante toda a tempada, o que pasa é que agora non podemos priorizar a Eurocup sobre a Liga e hai que ir sempre con todo. Esperemos ser competitivas nas dúas competicións”. Martínez remarca, ademais, que o obxectivo nestes dous primeiros encontros era “competilos a morte” e xa o domingo, en función do ocorrido, analizar o traballo feito de cara á decisiva vindeira semana. Sumado a todo isto, o conxunto porriñés tivo dúas baixas na última xornada de Liga, aínda que parece que ambas xogadoras estarán dispoñíbeis para o encontro deste sábado. “Mica [Casasola] non chegou para o partido de Liga e durante a semana os servizos médicos do club fixeron esforzos para que chegue á European Cup este sábado. E Daniela [Moreno] xa viaxou connosco para o partido da cuarta feira e si estará dispoñíbel. A verdade é que son moitos partidos, levamos máis de 40 este ano, é moi complicado que todas as xogadoras estean sas e a 100%”, recoñece o técnico. Guardés e O Porriño comezan a loita polo título de Liga Chegar aos últimos meses nesta situación non sería posíbel se non se fixese un gran traballo durante todo o curso, e isto quere destacalo Martínez: “Creo que fixemos unha tempada inmellorábel, competimos moi ben na Copa da Raíña, nunha semifinal na que fomos mellores durante 50 minutos. Fixemos un cuarto posto na Liga e chegamos a unha final europea. Creo que, independentemente do que pase agora, e aínda que soe vitimista, que non o é, o balance da tempada ten que ser positivo”. O mellor recordo desta primeira aventura europea Tras xogar a ida dos cuartos do play-off polo título de Liga fóra da casa, o Conservas Orbe Zendal BM O Porriño recibe este sábado no seu feudo o Valur da liga islandesa (17 horas, Pavillón Municipal do Porriño). Unha cita única para unha vila que se entregou en corpo e alma ás súas xogadoras: "O pobo está moi ilusionado e moi involucrado. A venda de entradas está a arrasar, quedan moi poucas, vaise encher o pavillón". E ante a previsión de que os billetes para a primeira final continental do equipo –na súa primeira aventura na competición– puidesen voar en horas, ampliouse a capacidade do recinto en 400 asentos, para alcanzar así os 2.000. Para a final, as galegas terán o hándicap de xogar a volta fóra da casa. Polo tanto, o obxectivo do equipo de cara ao encontro deste sábado é “facer un partido tacticamente moi bo para poder ir con vantaxe a Islandia, onde elas son aínda máis fortes, xa que na súa casa están a facer eliminatorias moi boas". "Haberá que aproveitar o factor cancha na ida”, subliña o adestrador do Porriño. Segundo Ismael Martínez, as claves desta final pasan por: “Ser capaces de defender o que elas fan ben, que é, sobre todo, o xogo de 'unha contra unha', tentando estar firmes nas axudas. E creo que nos interesa un ritmo de xogo alto, porque elas teñen unha rotación máis curta que a nosa, dado que na primeira liña utilizan poucas xogadoras. Interesaranos desgastalas mediante un xogo transitivo”. O BM O Porriño segue facendo historia e disputará a súa primeira final europea Por último, o técnico porriñés tamén incide en que o estado físico será moi importante nesta eliminatoria: “O Valur quedou primeiro na Liga e tivo un cruce moi sinxelo, polo que din os resultados da semifinal [25-23 e 30-20], e, de feito, están descansando desde hai varios días. Ademais, xogarán o seu play-off de Liga despois da European Cup, e nós xogámolo polo medio... Creo que é unha desvantaxe grande, pero é o que temos, hai que facelo e xa está”. O futuro dun equipo disposto a tocar o ceo Pase o que pase nestas dúas semanas, a tempada do BM O Porriño quedará para o recordo debido á solvencia que tivo á hora de compaxinar o seu debut en competición europea, chegando á final, xunto cunha gran tempada regular, logrando un meritorio cuarto posto. Ismael Martínez resalta que a clave de que este grupo de xogadoras e corpo técnico triunfase foi o traballo constante: “Durante todo o curso valoramos moito a mellora individual que estamos a ter en cada unha das nosas xogadoras e que está a facer que o equipo sexa máis forte, polo que eu valoraría, sobre todo, o traballo delas, o diario e o de mellora individual”. O éxito desta campaña traduciuse na saída de varias xogadoras, entre as que destacan a súa capitá Sarai Samartín, e Maddi Bengoetxea, unha das estrelas do equipo. “Os cambios son un proceso natural. Cando as xogadoras melloran é normal que teñan ofertas máis fortes a nivel económico ou deportivo”, admite Martínez. O propio técnico fala tamén sobre o seu futuro: “No meu caso concreto, sentamos a falar e aparcámolo até final de tempada, pero está ben encamiñado. Aínda así, imos esperar ao final para falalo outra vez e fechar as pequenas cousas que queden por fechar”. Guardés, a por unha remontada histórica O Mecalia Atlético Guardés recibe este sábado no seu feudo o CD Balonmano Aula Valladolid na volta dos cuartos de final do play-off polo título de Liga (19 horas, A Sangriña). As de Ana Seabra terán a difícil tarefa de remontar unha eliminatoria á que chegan con seis goles de desvantaxe, mais os ánimos están máis vivos ca nunca e a confianza é plena para pasar de rolda e seguir loitando por este soño. O conxunto da Guarda rematou a tempada regular como líder mais non chegou ao play-off coas mellores sensacións. Na ida dos cuartos o Valladolid soubo aproveitar os erros cometidos polo cadro galego e chegou ao descanso cunha vantaxe de seis goles. Á saída dos vestiarios, o Guardés entrou mellor no partido e recortou distancias, mais o equipo local fixo valer o factor cancha e recuperou a vantaxe da primeira metade... mais deixando todo aínda por decidir este sábado na Sangriña.