Dez anos do Resurrection Fest non poden celebrarse como unha vulgar data de aniversario no calendario dos festivais europeos de música. Iso fica para os macro-festivais de renome a golpe de talonario de grandes marcas de publicidade. O Resu cumpre 10 anos de vida e por iso a edición de 2015 vai ser das de agárrate á regala que vas pola borda. Tres días (16, 17 e 18 de xullo) para aguantar ou rebentar.
O cartaz foi dado a coñecer nesta cuarta feira e en apenas unhas horas xa é Trending Topic (TT) nas redes sociais. Non é para menos: un total de 40 proxectís musicais de diferente calibre, certo, mais impacto para dar e encher. Tres nomes dominan a proposta: Motörhead, Korn e Refused. O primeiro e o terceiro nos seus únicos concertos no Estado. Son tres nomes que obrigan a conter a respiración.
Mais non son os únicos. A listaxe obriga a coller aire. Desde os In Flames a Satanic Surfers. De Fear Factory a Nuclear Assault ou Terror. Estilos variados, épocas distintas. Variedade dentro do gosto polas marxes, polo ruído.
Colle folgos, vén o Resu
Como é habitual, tamén hai bandas que marcaron no seu momento historia dentro do panorama do punk e do hardcore. Das que figuran en calquera antoloxía do xénero a nivel mundial. Noutras edicións por Viveiro pasaron Black Flag ou Dead Kennedys, por citar dous deses nomes. Tamén en 2015 haberá eses nomes de grupos que lembran cando o HC non tiña tatuaxes nin panos no pelo. Tres exemplos: Anti-Nowhere League (punk-hardcore británico, formado en 1980), Poison Idea (un mito do hardcore. Naceron en Oregón nos primeiros 80 e deixaron traballos imprescindíbeis do xénero) e DRI (saltaron do HC que practicaban nos 80 a ser unha referencia do metal crossover nos 90). E máis un: 7 seconds. A banda histórica de Reno, un conxunto que figura con voz propia na historia do punk-hc.
Nesta edición tamén haberá representación naciona, de Galiza, con combos como Aphonnic ou Bastards on Parade.
Na web xa hai unha oferta bono para os 3 días por 75 euros. ‘The Storm is coming’ é a palabra de orde para un festival que é único. E que cada edición atrae a milleiros e milleiros de fieis, gran parte deles de alén da Península Ibérica.
