O WOS Festival desvela a potencia creativa da música electrónica da Galiza

"É un verdadeiro milagre que un festival como o WOS teña lugar na Galiza. É un festival moi complexo de produción, con moitos escenarios, e cunha proposta artística moi valente e arriscada, case temeraria. Despois de ter viaxado por moitos países, podo asegurarte que un festival como este non se atopa máis que en moi contadas cidades de Europa". Quen así fala é Viktor Flores, xornalista, Dj, curador e creador sonoro con máis de trinta anos de traxectoria en practicamente todas as ramas da música electrónica, un xénero que mantén certo espírito underground e que non adoita aparecer nas páxinas de cultura máis que con motivo de grandes eventos e festivais. Flores, xunto con Frankie Pizá -tamén xornalista musical e experto en novos formatos de comunicación-, coordina e modera un ciclo de dúas mesas redondas dentro do programa do WOS nas que participarán artistas, colectivos, Dj's e promotores e que, baixo o título O son electrónico de Galicia: unha conversa interxeracional, ten como propósito ofrecer " unha visión panorámica do estado actual das diferentes escenas" e, ao tempo, servir como unha "retrospectiva oral e conversacional dos últimos anos de música electrónica". "Quixemos propiciar un encontro entre a xente nova que é agora a protagonista da escena electrónica cos que xa somos máis veteranos, coa xeración dos que comezamos a principios dos anos 90, cando algúns deles aínda non naceran", explica Flores. "É algo que nunca se fixo na Galiza e que nos vai permitir ver o que había e o que hai, o que cambiou e o que aínda permanece". A vangarda audivisual cítase en Curtocircuíto Unha escena vibrante Flores, que exerceu de picadiscos no mítico Vademecwm de Vigo e que lembra outras salas da cidade nas que xa nos oitenta se podía escoitar o house de Chicago, como o Op-Art, opina que a creación vive agora mesmo un momento doce. "Ás veces queixámonos de moitas cousas, e con razón, pero o certo é que nunca houbo unha escena tan vibrante, tanto de promotores como de artistas. Recompilando nomes para organizar estas mesas decateime de que hai unha cantidade de artistas inabarcábel, e dunha calidade moi considerábel, cando non superior. Hai moitos que non están por espazo e tempo, non por falta de méritos". Os que si estarán nas mesas que se desenvolvewrán os días 15 e 16 de setembro, ás 16 horas, no auditorio do CGAC, serán Akazie, Arkestra Discos, Dial Electrónico, Jelly, Modulartec, Peligro Club, Must Be On Wax, Neo2000Klub, RetroFuture, Russ, Sisters of Rave e TR3MOR, para todos os cales Flores ten palabras de eloxio. "Unha das diferenzas que hai entre esta xeración e a nosa é que eles teñen menos complexos á hora de explorar territorios. Nos anos 90, os xéneros estaban moito máis definidos e non se tocaban: eras de techno ou eras de house, por exemplo. Agora a xente nova é máis permeábel, o que lles dá unha apertura moito máis interesante", declara. Electrónica de base para outras músicas do pobo Pasado e presente Máis alá do WOS e doutros grandes encontros, seguen sendo os clubes a incubadora onde xermolan as ideas das creadoras e creadores? Flores cre que "agora existen outras alternativas, especialmente no entorno dixital. Os festivais teñen a vantaxe de que podes descubrir moitas propostas diferentes condensadas en pouco tempo. Pero os clubes seguen a ser a expresión primixenia e definitiva deste tipo de música, a que permite que logo se articulen propostas arredor doutros axentes. Neles atopas xente coas mesmas preocupacións, onde o intercambio é máis inmediato". Nese sentido, Flores lembra que a finais dos 80 e principios dos 90 foi crucial a ponte entre Vigo e o Porto. "A conexión con Portugal foi fundamental. Sen ela, moitos proxectos desenvolveríanse dunha forma completamente diferente. Antes de que existisen festivais como o Sónar nós xa íamos a Porto a descubrir músicas que non se coñecían nin en Madrid nin en Barcelona. Co tempo fomos estabelecendo contactos, eles viñan picar a Vigo e nós a Porto. Máis adiante, cando abrimos a tenda de discos Sinsal, asociámonos con Materia Prima, de Porto, e a base de compartir gastos, traiamos artistas de centroeuropa -xente dunha vangarda completamente descoñecida noutros lugares do Estado- que tocaban en Porto e Vigo, ás veces tamén en Lisboa, e volvían. Formouse un tecido de clubes moi dinámico, pero a crise de 2008, fixo que fechasen moitos locales e que as cidades quedasen sen lugares de referencia. Aquela crise modificou dunha maneira fundamental toda a rede creativa". Aquela rede de clubes vai recuperándose, ás veces cos mesmos protagonistas -o propio Flores programa agora na sala Mondo de Vigo- e outras con novas voces como as dos novísimos xemelgos que forman Yugen Kala "que traen proxectos moi na vangarda sonora, xente que só se pode ver nalgúns lugares de Austria, Polonia ou en Barcelona". Neste momento existe unha xeración chea de novas ideas ás que hai que deixar paso. "Akazie, por exemplo, é unha artista cunha gran proxccción, cun discurso moi coherente que achega a cultura de club e a arte sonora; o colectivo Sisters of Rave fai unha proposta de eventos de caracter feminista cunha identidade moi potente; Neo2000Klub crean na liña queer desde un punto de vista moi rotundo; Must Be On Wax programan con moitísimo olfacto... " Flores conclúe elaborando todo un breviario que demostra que a fortaleza da electrónica galega parece asegurada, polo menos, por unha xeración máis. O festival Resis estrea música contemporánea con selo galego na Coruña Tres estreas mundiais e dezasete estatais na 7ª edición do WOS Festival Apartir desta quinta feira e até o domingo 17 de setembro, Compostela acollerá a sétima edición do WOS Festival, o encontro multidisciplinar dedicado a promover e fomentar a música e a cultura de vangarda con concertos e actividades en diferentes espazos de alto valor patrimonial da cidade. O festival ofrecerá ao longo de catro xornadas un total de 29 actuacións musicais con artistas procedentes de máis de 15 países de todo o mundo (desde Exipto até India, pasando por Reino Unido, Portugal, Serra Leoa ou Australia, entre outros). Tres estreas mundiais e dezasete a nivel estatal farán parte dunha programación arriscada, global e de vangarda que consolida a cita como un dos festivais de referencia en Europa, tanto para artistas da escena electrónica como para promotores e público. Croatian Amor, ABADIR, Lee Gamble, Malibu, Loraine James ou CORIN, por destacar só algúns dos nomes, son outras das figuras que formarán parte dun cartel que ofrecerá este ano tres estreas mundiais: alén da xa mencionada Japan On Film (Live) de Midori Takada, o público gozará por vez primeira de Alex Aller &amp; Margarida Mariño present Transmutation (Live AV) e Kosu Nes &amp; Urok presents Itionomaxi (Live AV). Alén de achegar ao país a arte de grandes figuras internacionais, WOS Festival mantén o seu interese pola escena local. Desde aquela primeira edición, a súa aposta polo tecido creativo galego sempre estivo presente. Este ano o evento contará con artistas como Ivankovà, JUAIT, Alex Aller &amp; Margarida Mariño, Akazie, Kosu Nes &amp; Urok e MIL111.