O Valle Inclán da Xunta non fala galego

O pasado 24 de abril, o conselleiro de Cultura, Educación, FP e Universidades, Román Rodríguez, participou na presentación -na Casa de Galiza de Madrid- da segunda edición do Festivalle, un festival de artes escénicas, en palabras do conselleiro, para homenaxear Valle-Inclán e recuperar a súa dramaturxia, “un legado que segue sendo unha fonte inesgotábel de inspiración para xeracións enteiras de dramaturgos en todo o planeta”, dixo o representante da Xunta da Galiza. Festivalle -organizado pola Asociación de Amigos de Valle Inclán e dirixido por Xosé Luís Méndez Romeu, quen fora conselleiro de Presidencia, Administracións Públicas e Xustiza da Xunta da Galiza, durante o bipartito, ademais de voceiro do PSdeG-PSOE no Parlamento galego- desenvolverase entre o 10 e o 15 de xullo deste ano en Vilanova de Arousa e incluirá seis producións teatrais. 'O auto do Castromil', gañadora do III Certame Manuel María de Proxectos Teatrais, estrearase en Compostela Ausencia da lingua Segundo puido saber Nós Diario, a primeira edición do festival non logrou cumprir os requisitos exixidos nas axudas de concorrencia pública para obter subvencións, polo que este ano financiarase integramente a través dun convenio coa Xunta da Galiza. E aquí comezan os problemas: por un lado, o programa do festival non inclúe ningún espectáculo realizado por compañías profesionais galegas, e a única presenza da lingua galega virá da man dunha montaxe que presenta o alumnado da Escola Superior de Arte Dramática da Galiza. As axudas a festivais da Xunta da Galiza teñen como requisito incluír no programa unha determinada porcentaxe de espectáculos producidos por compañías profesionais do país para poder acceder a elas. Esta condición aplícase tanto aos festivais que acoden ás subvencións en réxime de concorrencia competitiva como a aqueles que teñen asinado un convenio coa Xunta. Neste caso, porén, ese requisito parece ter sido obviado, o cal supón un agravio comparativo para o resto de festivais que aspiran a ter axudas públicas. Por outro lado, a ausencia de producións galegas poderíase interpretar como un incumprimento do Estatuto da Axencia Galega de Industrias Culturais que marca como obxectivo “o impulso e a consolidación do tecido empresarial no sector cultural galego” e “o progreso da cultura galega, e especialmente, a normalización e o impulso do idioma galego como medio para protexer e fomentar a identidade cultural da Galiza”. Corenta anos de humor escénico na Mostra de Teatro de Cangas O custo descoñecido dun festival Por se isto fose pouco, descoñécese o importe da axuda que a Xunta da Galiza dedica a este festival, nin se a participación económica da Administración responde aos principios de equidade, igualdade e transparencia. A deputada polo BNG Mercedes Queixas preguntou no Parlamento polo custo deste evento sen, polo de agora, obter resposta. “Seguimos sen ter resposta a varios interrogantes”, explica Queizas. “Non sabemos que criterios sustentan a colaboración da Xunta co Festivalle nin por que se sitúa nesta situación de privilexio fronte a outros festivais de recoñecido percorrido e prestixio na Galiza que non teñen ese apoio por parte da Xunta”. A deputada, ademais, pregúntase cales son os criterios obxectivos que analizaron o retorno do investimento deste festival que a organización cualificou de “notábel impacto a nivel turístico e hostalaría”. Dramaturxias da revolución Perplexidade do sector Desde o sector, a situación deste festival non deixa de ser vista cunha certa perplexidade. O dramaturgo Santiago Cortegoso, presidente de Escena Galega, a Asociación Galega de Empresas de Artes Escénicas, declara a Nós Diario que “é un festival que descoñecemos absolutamente e que non ten ningunha relevancia dentro do sistema teatral galego. A súa existencia semella independente do que, con moito esforzo, estamos construíndo”. En todo caso, como asociación, considera que “as axudas públicas deben ser concedidas en réxime de concorrencia e, no caso de que haxa un convenio, deben explicarse as causas que o xustifican e o importe que se lle dedica. É unha cuestión de seriedade e de transparencia”. Carlos Ledo, director da Asociación de Festivais de Artes Escénicas, consultado por Nós Diario, declara que "a cuestión non foi aínda discutida de maneira oficial no seo da asociación, pero hai unha realidade indiscutíbel que é que non se lle está esixindo ao Festivalle o mesmo que se nos esixe aos demais. A convocatoria de axudas aos festivais deste ano esixe ter un mínimo dun 30% de espectáculos de compañías profesionais galegas -que a min xa me parece pouco- pero o Festivalle non ten nin sequera unha obra na nosa lingua. Resulta decepcionante que se apoien iniciativas que van á contra do sistema teatral deste país". 'Memoria, cohesión e innovación', eixos da 39ª Mostra de Teatro de Ribadavia Un festival orientado ao teatro comercial que triunfa en Madrid O festival presentará varios éxitos do teatro comercial español: Don Ramón del Valle-Inclán, un monólogo de Pedro Casablanc; Los cuernos de Don Friolera, da compañía Morfeo Teatro; El alma de Valle-Inclán, a cargo de Rafael Álvarez “El Brujo”, quen tamén presentará no festival La lámpara maravillosa, unha estrea absoluta. O día 14, a Escola Superior de Arte Dramática da Galiza ofrecerá a súa representación de A cabeza do Bautista, e o sábado 15, como remate da programación, a compañía El Callejón del Gato representará para público familiar La cabeza del dragón.