O Teatro Municipal de Tui acolle esta terza feira a xornada Francisco Sánchez no IV centenario da súa morte, unha cita organizada polo Consello da Cultura Galega e o Concello de Tui co obxectivo de visibilizar e dar a coñecer a figura de Francisco Sánchez, auténtico prototipo do home do Renacemento que deixou unha obra predecesora da revolución filosófica dos séculos XVII e XVIII.
A xornada comezará cunha intervención a cargo de Rafael Sánchez Bargiela, que se centrará na biografía da figura homenaxeada. Logo, Suso Vila abordará a ascendencia xudía de Francisco Sánchez e afondará no Tui da época e nas relacións con Portugal. Sobre o perfil médico de Sánchez falará Gonzalo Gómez García, profesor da Universidad Francisco de Vitoria, e concluirá Idalina Maia Sidoncha, profesora da Universidade da Beira Interior (Covilhã), cunha intervención sobre o pensamento filosófico de Sánchez.
A xornada fechará cun concerto no Teatro Municipal, a cargo do coro de cámara Vox Stellae, titulado A propósito de Francisco Sánchez "o escéptico", que percorre a súa vida.
Que nada se sabe
Francisco Sánchez, coñecido como o Escéptico ou o Tudense, tivo un espírito polifacético que o levou a interesarse tamén pola astronomía e a matemática. Este observador infatigábel da natureza escribiu a obra Quod nihil scitur (Que nada se sabe), unha referencia fundamental do pensamento filosófico europeo de finais do século XVI.
Ademais, o día 16, coincidindo coa data exacta do falecemento de Francisco Sánchez, terá lugar a inauguración dun monólito e a presentación da tradución ao galego da súa obra Quod nihil scitur realizada polo profesor Laureano Alonso, con ilustracións de Andrés Lamas e editada polo Concello de Tui.