Fiel á súa cita anual, chega o Titirideza. Do 24 ao 27, Lalín acollerá espectáculos de compañías que utilizan exclusivamente os monicreques como elemento dramático: La mar de marionetas; Periferia teatro de títeres; Títeres Babaluva e A Xanela do maxín, amais de Catro pés e Rojo telón.
Segundo explica a organización, os espectáculos que veremos “teñen en común que son producidos e dirixidos por compañías de mulleres”, algo que representa as “miradas diversas sobre o feminino”. Atoparemos a voz de personaxes dos contos clásicos, e outras que reflexionan sobre a liberdade, as emocións ou a solidariedade.
A esta festa do teatro de monicreques súmase o Museo Galego da Marioneta cunha pequena retrospectiva do traballo de Fernanda Cabrera Varela, fundadora de Marionetas Trécola e persoa fundamental na historia do teatro de marionetas do noso país; que xa se pode ver no Pazo de Liñares desde o 18 de agosto.