venres 15/10/21
Caderno de Verán

SonDaRúa: Un combate por disputar

A banda de rap, procedente do municipio de Ponteareas, sacou o seu disco Eterno Combate en plena corentena. Por iso, os tres artistas que a forman agardan ter a oportunidade de xirar cunha ducia de temas "eclécticos"
son da rúa
Imaxe promocional dos membros de SonDaRúa (Foto: Nós Diario)

No medio dunha escena moi activa en Ponteareas sobresaen os MC –ou mestres de cerimonias como se lles chama nesta cultura, Iván, Hugo e Álex– de SonDaRúa, un grupo que comezou "hai tres anos e pico". Nese tempo o proxecto tornou máis serio e as rimas deron o salto dos parques aos escenarios.

Álex, un dos membros desta banda de b-boys, recoñece que este ano dista moito do que agardaban. Era para consolidarse, pois o pasado mes de abril sacaron ao mercado traballo discográfico. "As cousas están difíciles", asume, a pesar de que foron convidados a formar parte do cartaz dun festival recoñecido de Vic, en Catalunya. 

A intervención será online polas medidas sanitarias e a seguridade. "Tamén temos algúns concertos para outubro", adianta o artista. 

Ao preguntarlle se aproveitaron o confinamento para adestrar a súa creatividade e dar vida a novos temas, é brutalmente sincero. "Sacamos o disco en abril con doce temas e queremos darlle cancha a ese proxecto porque nos poucos meses que tivemos non o rodamos", resume.

Cun confinamento histórico que os colleu polo medio do que debería ser publicidade, promoción e actuacións, parécelles unha mágoa non deixar que esa ducia de cancións novas non teña o seu percorrido. 

Para aquelas persoas que aínda non deran o paso de escoitar SonDaRúa, en Eterno Combate propoñen un fol de temas "ecléctico". "Hai bastante variedade con distintos tipos de música como rock, o reggae, o rap... E cae algunha balada", recoñece. Na forma, o que muda son as bases sobre as que traballan estes rapeiros. Anima a todo o mundo a escoitalo porque "non vai deixar indiferente a ninguén, aburrido non é".

Ademais, a sesión musical pode acompañarse do vídeo de Eterno Combate, que gravaron in extremis dous días antes de que se decretara o Estado de alarma.

O plus é que seguindo o exemplo doutros colectivos, a mocidade ten elixido o galego para expresar as súas preocupacións e inquedanzas. Queren saír ao exterior pero a situación non o permite: como antesala xa visitaron O Porto. 

comentarios