O Boletín Oficial da Provincia de Lugo publicou esta terza feira 19 de decembro, a listaxe definitiva das axudas de concorrencia competitiva para colectivos e asociacións culturais da Vicepresidencia da Deputación de Lugo. Finalmente, foron concedidas 338 axudas para a organización de actividades culturais e para investimentos en equipamento e mellora de locais sociais, cun importe total de 375.000 euros.
Entre as propostas financiadas nesta anualidade inclúense clases de música e de baile tradicional, obradoiros de teatro, de narración oral ou de pintura, documentais, publicación en papel, certames, xornadas sobre historia ou patrimonio, celebracións populares e outras actividades de posta en valor das tradicións e do patrimonio inmaterial que reciben financiamento a través desta convocatoria dirixida ao tecido asociativo e cultural de base.
Da mesma maneira, as axudas para investimentos centráronse na adquisición de moblaxe e dos materiais de uso técnico ou artístico necesario para o uso social e cultural dos locais das distintas asociacións.
O importe destas axudas oscila entre os 500 e os 3.000 euros, en función dos criterios estabelecidos nas bases da convocatoria. A deputada Iria Castro lembrou que "desde a área de Cultura da Deputación case se duplicou o orzamento respecto a anos anteriores, o que permitiu, ao mesmo tempo, practicamente dobrar o número de asociacións beneficiarias”.
"Este conxunto de iniciativas permite garantir o acceso á cultura á cidadanía de todo o territorio, así como promocionar o uso da lingua e a posta en valor do patrimonio", sinalou a responsábel provincial.
