A Rede Museística de Lugo convoca unha nova proposta formativa, un ciclo de conversas, espazos de participación e un módulo formativo, nesta ocasión baixo o título Museos, sustentabilidade, benestar / Avaliar, medir, mellorar.
A proposta está dirixida a persoas vinculadas ao sector cultural, educativo e creativo da contorna iberoamericana e ten carácter gratuíto.
As conversas permitirán ás participantes reflexionarsobre como activar -dende os museos ou calquera proxecto de carácter cultural- diferentes prácticas para mellorar o benestar social e a sostibilidade, avaliando e medindo o seu impacto.
Ciclo de conversas
Participan, entre outros, o economista Pau Rausell, director da unidade de investigación en economía da cultura da Universitat de Valéncia, que abordará o impacto social da cultura e as novas formas de medir e avaliar; Encarna Lago e Ángeles Miguélez, xerente e traballadora da Rede Museística, que compartirán as estratexias de inclusión dende a empatía desenvoltas nos catros museos, xunto con Sergio Lago (BenCuriosa), que falará de metodoloxías para diagnosticar barreiras de acceso e participación.
Hugo Cruz (Art & Participation, Portugal), desenvolverá unha aproximación ao concepto de “calidade” da participación cultural e artística; Giada Calvano (co-fundadora Chloe Sustainability e investigadora cultural), ofrecerá as claves dunha estratexia de sostibilidade ambiental, económica e social; Guillem d'Efak Fullana-Ferré (Museu Nacional d'Art de Catalunya) abordará a relación entre arte e saúde, mentres que Elena Villaespesa (National Gallery of Art de Washington e Pratt Institute School of Information) falará de sostibilidade dixital e ferramentas para a súa avaliación.
Proposta vinculada ao Día Internacional dos Museos
Coa apertura da súa comunidade de aprendizaxe para acoller este ciclo formativo, a Rede Museística Provincial de Lugo vincúlase á proposta do
Consello Internacional de Museos (ICOM), que determinou como lema deste 18 de maio Museos, sostibilidade e benestar.
Arredor desta efeméride entidades museísticas de todo o mundo realizarán actividades que visibilizarán o papel fundamental de museos en
particular e cultura en xeral no benestar e desenvolvemento sostible das súas comunidades. No caso da Rede Museística Provincial de Lugo, a
celebración coincide coa apertura da comunidade de aprendizaxe arredor deste programa formativo, coordinado por BenCuriosa.
