A moeda galega, parte dunha identidade

Cunhas dez mil moedas e medallas nos seus fondos, o Museo Provincial de Lugo acolle unha das coleccións numismáticas máis destacadas non só da Galiza, senón de todo o Estado. Desde hai uns anos, o Museo está inmerso nun labor de ordenación e difusión deste patrimonio, un labor no que se inserta a exposición De monetaria galega. Galiza e a súa moeda dende a Antigüidade ata os nosos días, que está patente nas salas da institución até o 30 de xuño, e as xornadas de divulgación que, en paralelo á mostra, decorren desde onte no pazo de San Marcos baixo o título A moeda en Galicia desde a caetra ata o euro, que percorre a historia da moeda galega desde a á época romana até a actualidade. De monetaria galega pretende dar a coñecer ao público xeral as diferentes moedas que se acuñaron na Galiza ao longo do tempo e a percepción cultural que o numerario tivo na cidadanía, trasladando unha mensaxe clara: a relación dos galegos coa súa moeda foi relevante política e economicamente. "Non me corresponde a min dicilo, pero creo que quedou unha exposición moi ben montada e moi didáctica", di, en conversa con Nós Diario, Antonio Roma, un dos comisarios da mostra, xunto con Aurelia Balseiro e Pablo Núñez Meneses. "A colección de Lugo é moi interesante e está moi ben complementada polos préstamos doutros museos e de coleccións particulares". O sestercio da caetra, declarado BIC en setembro, podería vir ao Museo Provincial de Lugo Máis alá do sestercio de Augusto Nas últimas semanas, o chamado "sestercio de Augusto" -unha das pezas máis singulares das expostas- ocupou multitude de titulares pola posibilidade de que un dos tres exemplares que se conservan no mundo pase a integrarse definitivamente no depósito do museo, se os trámites iniciados chegan a bo porto. Trátase dunha moeda romana de bronce, do século I a. C., de 38.07 gramos de peso, coa cabeza de Augusto no anverso, e o escudo da caetra -as armas dos galaicos vencidos- no reverso. Dunha maneira simbólica, representa a conquista do territorio galaico por parte dos Imperio romano. A peza non presenta marcas de ceca nin de datación, polo que a súa data de emisión e lugar de produción non están definidas e seguen a ser obxecto de investigación. Sospéitase que puido ser realizada en cecas como as de Augusta Emerita (Mérida), Lucus Augusti (Lugo) e Colonia Patricia (Córdoba), e incluso noutros obradoiros de carácter ambulante que acompañaban ao exército. Mais a exposición, mostra outras pezas cuxa relevancia transforma a cita en imprescindíbel para as persoas afeccionadas á numismática. Como exemplo do interese que pode suscitar De monetaria galega, Roma cita as moedas xermánicas que se mostran. "A moeda xermánica, a dos períodos suevo e visigodo, é moi escasa, é unha época na que na Galiza se acuña moi poca moeda, e poder ver nove pezas xuntas é case un acontecemento", precisa. Outra peza que resulta curiosa e que se relaciona coas peregrinacións xacobeas é o tesouriño de Santiago Alfeo, "un relicario no que os peregrinos deixaban moedas a carón das reliquias", conta o comisario da exposición, "e que agora se expón aquí xunto con esa moedas deixadas polos que chegaban a Compostela despois de facer o camiño". Dunha época máis achegada á nosa é un billete único que ten unha rechamante e pouco coñecida historia detrás. "Durante un período do século XIX, no Estado español permitiuse a creación de bancos de emisión, é dicir, de bancos que podían emitir o seu propio papel moeda, os seus propios billetes, ao lado dos emitidos polo Banco de España", explica Roma. "Dous deses bancos estaban na Galiza, un na Coruña e outro en Santiago, e na exposición pode verse un dos billetes fabricado en Compostela, un exemplar único". A xoia da numismática, no museo Encontro de especialistas As VI Xornadas de Divulgación Científica do Patrimonio Arqueolóxico Lucense abordan, desde distintas perspectivas, o contexto e a historia monetaria galega e reunen en Lugo especialistas das universidades galegas, do Museo Arqueolóxico Nacional de España e do Museu Nacional d’Art de Catalunya. "Trátase dun encontro paralelo que permite que os especialistas debatan sobre o estado das investigacións neste campo", explica Antonio Roma."E nese sentido creo que podemos estar contentos. Neste momento hai unha xeración de especialistas na Galiza que están traballando con moita frescura, que están facendo moi boa ciencia e que permiten que os estudos numismáticos sobre a moeda galega estean dando un salto cualitativo". A historia das moedas galegas, no Museo de Lugo