Na súa casa da Matanza, despois de tres días de agonía, morría Rosalía de Castro, a grande figura das letras galegas. Cúmprense 129 anos do seu pasamento e a Fundación Rosalía, con sede na propia casa na que finou, organiza, como cada ano, un acto na súa lembranza no que intervirán José Manuel Blanco, Pepe Barro, e o presidente da RAG, Xesús Alonso Montero. A seguir, a poesía homenaxeará a grande escritora nas voces de Andrés Fernández, Laura Espiño e Paula Rey, que gañaron o concurso escolar, así como de Gonzalo Hermo, Ledicia Costas, Luís González Tosar, Cesáreo Sánchez e Luz Pozo. O trío Puntada Sen Fío porá o ramo ao acto co “Música para Rosalía”.
“Abre esa ventá que quero ver o mar”, escribiu González Besada que lle dixo Rosalía a súa filla Alexandra xusto antes da súa morte. O fillo Ovidio, con pouco máis de vinte anos, pintaría de maneira tráxica o corpo da nai morta nun óleo que se mostra aínda na casa da Matanza. A poeta sería enterrada no cemiterio de Adina, a pouca distancia da casa familiar, antes de ser trasladada ao Panteón de Galegos Ilustres, en San Domingos de Bonaval.