mércores 26/01/22

Oliver Laxe xa é fillo adoptivo de Navia de Suarna

O director de cinema Oliver Laxe vén de se converter no "mellor embaixador" polo mundo de Navia de Suarna, segundo presumía onte o alcalde deste concello, José Fernández. E é que esta semana o pleno municipal acordaba por unanimidade outorgar o título de "fillo adoptivo" do Concello, tendo en consideración as orixes maternas do cineasta na parroquia de Son, no lugar de Vilela.
Oliver Laxe [Foto: Irene Pin]
Oliver Laxe [Foto: Irene Pin]

"É unha persoa que ten un grande apego ao noso concello. Retornou e volveu vivir aquí de onde eran as súas raíces", lembrou de Laxe, que naceu con todo ben lonxe, en París en 1982, mais voltaba á Galiza aos seus anos para emprender logo a marcha a Barcelona.

Fernández puntualizou que o director da galardoada e celebrada O que arde que "desde a parte pública e política", entendían "que o mellor era nomealo fillo adoptivo". "Xa antes deste nomeamento é o mellor embaixador que temos por todo o mundo", proclamou Fernández.

Ademais, destacou que "é un emprendedor, á parte dun grande director de cinema está "arranxando a vivenda de onde eran os seus sus avós e a súa nai e vai montar unha actividade para dar a coñecer a nosa zona".

A pegada de O que arde

O alcalde de Navia insistiu na importancia do propio filme, o último na lista do director, O que arde, xa convertido no que máis público conseguiu reunir na historia do noso cinema, mesmo malia o impacto da pandemia. "Veuno rodar aquí e saíu moi ben, gañou dous premios e desde o 29 de setembro do ano pasado deixou un impacto no noso concello e en toda a Galiza moi importante", valorou. "Destacou moito o que é Navia de Suarna", concluíu o socialista.

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Oliver Laxe xa é fillo adoptivo de Navia de Suarna
comentarios