"A figura do padre Sarmiento está presente nas actividades do Consello da Cultura Galega desde os inicios da institución", explicou Rosario Álvarez, presidenta do Consello da Cultura Galega, durante a presentación, esta sexta feira, 8 de marzo, do volume dixital Erudición e ilustración. Estudos sobre Martín Sarmiento. Trátase das actas do Simposio Martín Sarmiento. De historia natural e todo xénero de erudición, e incorporan o traballo de doce expertos que abordaron a obra do intelectual galego desde diferentes ámbitos científicos. No acto de presentación participaron a propia Álvarez, e Henrique Monteagudo, editor da publicación.
Martín Sarmiento (1695-1772) foi autor dunha das obras intelectuais máis destacadas do século XVIII pero boa parte do seu traballo ficou inédito e sen ir ao prelo durante moitos anos. Xunto coas diferentes iniciativas de dixitalización e difusión levadas a cabo polo CCG desde a conmemoración do tricentenario do seu nacemento en 1995, sucedéronse biografías sobre o autor e algúns estudos sobre a súa obra pero "había vinte anos que non se abordaba un estudo crítico colectivo da súa obra", destacou Monteagudo.
Álvarez Lires aproveitou a celebración do Día da Muller para achegar a idea de que Sarmiento foi un "gran defensor da muller", sobre todo "da súa sabedoría popular". No seu traballo cítanse moitas mulleres científicas, así como ideas e pensamentos que "actualmente son controvertidos dentro do propio feminismo".
Unha obra oceánica
Este estudo colectivo foi levado a cabo por especialistas que abordaron a obra sarmientina desde diferentes aspectos como como a figura do padre Sarmiento no panorama intelectual do século XVIII (Joaquín Álvarez Barrientos), as súas achegas á toponimia galega (Gonzalo Navaza), a súa visión do comercio e da industria (Xoán Carmona), Sarmiento como introdutor das teorías de Isaac Newton (María Álvarez Lires) , ou a recepción da súa obra ao longo da Europa do XVIII e XIX (Concepción Varela), entre outros.
A obra é parte das iniciativas de dixitalización, posta en valor e difusión da obra de Martín Sarmiento que se agrupan dentro do Proxecto Sarmiento, o programa do CCG para a recuperación desta figura. No volume defínese a obra de Sarmiento como "oceánica", en relación aos numerosos textos e saberes reunidos polo frade.
Por outro lado, a presidenta do Consello de Cultura explicou que, desde o ano pasado, o 9 de marzo se celebra o Día do Naturalismo Galego, data que coincide co aniversario do nacemento de Martín Sarmiento.
