O festival Norte Cinema Diverso busca curtas en galego

N orte Cinema Diverso (NCD), o festival de cine LGBT+ que empezou a súa andaina en 2023, volve á Coruña os días 29 de febreiro, 1 e 2 de marzo. Entre as novidades figura a ampliación da duración do certame de dous a tres días e o impulso para que aumenten as curtametraxes en galego sobre esta temática. Crearon a mostra e traballan nela Fito Ferreiro e Fernando Cayazzo, membros da da asociación Palestra. O primeiro explica a Nós Diario que “despois da experiencia do ano pasado pensamos en potenciar a difusión de obras en galego” polo que iniciaron contactos coa Academia Galega do Audiovisual. “Sabemos que dará os seus froitos a medio e longo prazo, mais esta edición xa se notará unha maior presenza galega”, indica Ferreiro. A iniciativa comezará no coruñés Teatro Colón con algunhas innovacións que procurarán aumentar o número de obras e a súa chegada a públicos de diferentes idades. Con esta intención nace NCD Educa que achegará cinco curtas a varios centros da cidade. “Da mesma maneira que na sección oficial, nesta queremos que nas temáticas estean presentes todas as letras que conforman o colectivo LGBT+”, asegura Fito Ferreiro, “e non é doado”, engade. Fito Ferreiro: "Co cine é máis doado achegar o discurso e a realidade LGTBIQA+ dun modo máis amábel" Para chegar a contar con obras abondo no festival, a iniciativa galega contará de novo coa colaboración da Cinemateca Pedro Zerolo, de Madrid, cun importante arquivo sobre esta temática. O seu director, Gerjo Pérez, indica a Nós Diario que a colaboración pon o foco nas realidades menos visibilizadas “como son as persoas trans, que tamén son as máis vulnerábeis”. As curtas visitarán catro institutos a partir de mañá para facilitar debates "e espazos de reflexión". Polo de agora, este apartado é o único que conta cunha programación fechada, na que se poderán ver as obras Pancarta (Roberto Pérez Toledo, 2018), El mueble de las fotos (Giovanni Maccelli, 2009), Antes de la erupción (Roberto Pérez Toledo, 2021), No binario (Afioco, 2020) e 17 minutos con Nora (Imanol Ruiz de Lara, 2021). “Son moi variados e tratan tamén o acoso escolar nas aulas”, confirma o responsábel da Cinemateca. Cinema para a cativada na oitava edición de Pequefilmes Apertura coa curta 'Habitar', de Anxos Fazáns O festival abrirá coa curtametraxe Habitar (2023), de Anxos Fazáns. A peza audiovisual conta no reparto con Nicolás Martínez, Xanhe-O Rabelo, Xácia Ceive e Greta Debelius. A obra trata de responder as preguntas sobre a construción das identidades a través do retrato íntimo de persoas transxénero e non binarias da Galiza. Esta curta pasou xa en 2023 por festivais como o Playdoc (Tui, Baixo Miño) e foi seleccionada nas citas da capital galega Curtocircuíto e Cineuropa, ademais de estar presente no Festival Internacional de Cine de Xixón (Asturias). Sobre o NCD, Fazáns apunta en declaracións a Nós Diario que é "complexo dar unha opinión, malia ser da Coruña, por non ter asistido á primeira edición. Porén, considera que "é importante que existan na Galiza iniciativas deste tipo que programen pensando en achegar ao público a diversidade de realidades do colectivo LGBT+". Medrar xeograficamente A organización deste festival é ambiciosa e busca medrar en anos vindeiros. “Non se trata de facer máis días, para unha cidade como A Coruña tres días está ben, non precisamos dez”, recoñece Fito Ferreiro, “a idea en realidade é aumentar as obras que se reciben, tamén con máis presenza galega, e poder tamén nun futuro viaxar con elas até outros lugares da comarca coruñesa”, conclúe. Outro aspecto que salientan desde a asociación Palestra é a importancia de “organizar encontros con directoras e directores, tamén con artistas, para que haxa unha conexión coa cidadanía”. Esta posibilidade non é doada polos compromisos de moitas responsábeis das curtamentraxes. "Cadrar as datas é todo un quebracabezas", asegura Ferreiro. Tamén este 2024 entregarase o premio Marieta á mellor curtametraxe, que o ano pasado recibiu Una dedicatoria a lo bestia, dirixida por Nucbeade, o colectivo formado pola artista galega Andrea Beade (1988) e a madrileñas Quiela Nuc (1990) que, a través do medio audiovisual, a instalación e a performance, constrúen e rescatan relatos fóra da historiografía hexemónica. A súa obra gañadora mostraba, a modo de traballo de arqueoloxía, diversos obxectos atopados na sede do Padroado de Protección á Muller en San Fernando de Henares (Madrid), que estivo en funcionamento desde 1944 até 1985. O galardón conta co apoio das adegas Martín Códax, que achegan, ademais, o propio nome do premio. O cinema de Sharon Lockhart A organización da mostra está a fechar os últimos detalles da programación. Por iso, non deu a coñecer aínda cal será a curtamentaxe premiada e céntrase en animar o mundo audiovisual galego para que faga chegar obras para participar a través do correo electrónico nortecinemadiverso@gmail.com.