O MUMI tece redes entre as músicas da Galiza e Portugal

Artistas, editoras musicais, programadores de institucións públicas así como de festivais e salas privadas e axencias dunha parte e doutra da raia volven converxer no MUMI, Músicas no Minho, que comezou esta quinta feira e se prolongará até este domingo na eurocidade Valença-Tui. Se ben un dos obxectivos do encontro é ofrecer un espazo onde estabelecer sinerxías sólidas entre os diferentes elementos da industria musical, o programa deixa claro desde o inicio outros dos obxectivos marcados para esta nova edición da feira. “Queremos que se dean relacións entre os proxectos musicais e os programadores, polos en contacto, mais tamén que o público non profesional se sinta ben recibido. O concerto de apertura deste ano, aberto para o público xeral, fíxose ad hoc para o MUMI e tamén integra as miras aperturistas que quixemos incorporar nesta edición”, manifesta Ánxela Vila, membro da produtora Urdime e unha das organizadoras do MUMI. Este concerto ao que fai referencia é a primeira achega do evento a outras zonas da lusofonía. Así, os proxectos encargados de dar a benvida ás persoas asistentes na primeira actuación desta quinta feira foron Encaixe, pola parte galega, unha formación coral formada por 18 cantantes; O Gajo xunto co grupo As Sanfonas da Ponte Velha, pola banda portuguesa; e a proposta Destino do Clã, formada polos artistas brasileiros Nanan, Gustavito e Luizga. “A idea é irnos abrindo pouco a pouco cara a outras latitudes, tamén absorbendo o bo que poidan traer outros proxectos”, sinala Vila. A cuarta edición do MUMI comeza a conta atrás na eurocidade Tui-Valença Desta maneira, a feira convértese un ano máis nun punto de encontro para as músicas galegas e portuguesas, tecendo unha ponte de ida e volta entre os proxectos, as persoas encargadas de programar os eventos deste tipo e o público, que pode achegarse a novas propostas e coñecer de perto a industria de ambas as bandas da raia. “Queremos que a Galiza e Portugal colaboren directamente como xeradores de riqueza e diversidade. Tamén é esencial o feito de celebrar o evento nunha eurocidade porque permite que as persoas se vaian desprazando entre os diferentes espazos que temos programados, mesturándose tamén entre elas. Por suposto, hai moita xente de Valença e de Tui, mais coa nosa proposta tamén buscamos atraer a xente do resto da Galiza para que veñan descubrir o que pode ofrecer a outra beira do Miño”, explica Vila. Con oito proxectos seleccionados da Galiza e seis de Portugal e despois de recibir case 300 inscricións, avaliadas desde a organización, a feira segue a apostar por tecer redes profesionais que fortalezan o sector musical, así como na repercusión que isto poida ter na produción e comercialización das músicas de ambos os países. Nese sentido, Vila sinala que “temos a sorte de que tanto na Galiza como en Portugal se está a producir moito e de moita calidade, polo que tivemos que facer unha escolla que mostrara esa diversidade de proxectos, xéneros e estilos. Aínda que evidentemente apostamos por propostas que teñan vinculación coa raíz, polo tipo de feira que é, tamén temos exemplos de rock máis progresivo, como Moura, ou sons que tiran máis cara ao indie, como Anxo Araújo”. Un evento en auxe Seguindo as miras aperturistas ás que fai referencia a organizadora, a cuarta edición do MUMI tamén incorpora a colaboración coa Fira Mediterrània de Manresa, coa intención de abrir tamén as músicas galegas ao mercado internacional. Así, da banda catalá achegaranse a trompetista e cantante Alba Careta e o cantautor e produtor Henrio co seu proxecto de recompilación de cancións de berce do cancioneiro popular catalán, mostrando a unión e o diálogo que poden ter as diferentes tradicións ao enmarcarse dentro deste evento. Aliás, outra das novidades é o Espazo Loja, que acollerá os catálogos da portuguesa Tradisom, e das galegas aCentral Folque e Através Editora. “Estará aberto ao público todo o sábado no recibir do Teatro Municipal de Tui. As publicacións permiten ver o traballo que se está a facer dentro da industria musical de ambos os países e inclusive como se foron comunicando entre si. Por exemplo, ese mesmo día aproveitaremos para facer a presentación da novela gráfica Zeca Afonso. A balada do desterro, onde están implicadas Teresa Moure e Maria João Worm, mostrando o que se pode facer desde os proxectos transfronteirizos”, manifesta Vila. O novo Espazo Loja do MUMI acollerá editoras musicais A incorporación de novidades así como a apertura cara a novas latitudes é o reflexo dos resultados das pasadas edicións e do aumento das persoas acreditadas ano tras ano, impulsando un evento que está en auxe e que vai fortalecendo os lazos entre a industria galega e a portuguesa. “Este ano haberá unha maior presenza de programadores, tanto públicos -concellos e outras institucións- como privados -festivais e salas-, e tamén contamos con xente que participará nos speed meetings, reunións para coñecer os proxectos. Tamén hai un espazo para as axencias, xa que temos en conta que hai artistas que comezan e que asisten á feira, mais que aínda non contan cunha representación artística nin teñen acordos cunha distribuidora. Cremos que nos atopamos nun momento de madurez do proxecto, inclusive despois dunha pandemia antes da nosa segunda edición, e queremos seguir creando un espazo para que as distintas profesións implicadas na industria poidan estabelecer novas redes de contacto e coñecer propostas en primeira persoa”. Os coidados, o dixital e os fondos europeos, as necesidades da industria Alén dos eventos musicais da feira, o MUMI tamén busca impulsar a formación dos e das profesionais implicadas na industria. Por este motivo, outro dos puntos chave da súa programación son os faladoiros, que buscan cubrir as necesidades detectadas na industria. “As persoas que participamos na organización tamén temos axencias ou estamos vinculadas no noso día a día na distribución e produción musical, polo que sabemos cales son as cuestións que máis preocupan. Quixemos centrar parte destas conversas na comercialización dixital da música, porque precisamos saber cara a onde camiñamos, e tamén nas experiencias con financiamento europeo, posto que é un dos puntos que pensamos que máis pode interesar tanto á Galiza como a Portugal”, explica Ánxela Vila, membro da produtora Urdime e unha das organizadoras do MUMI. Catorce bandas de Galiza e Portugal na feira musical MUMI Así, outras das necesidades que buscan cubrir con estes faladoiros son as chaves para conseguir audiencias para músicas non maioritarias, pondo o foco na programación de eventos, e os vínculos que se poden tecer entre o asociacionismo galego e portugués. Asemade, a Asociación Galega de Xestoras Culturais estará presentando un estudo que levaron a cabo co obxectivo de desenvolver boas prácticas e xerar unha responsabilidade no sector. “A idea é traballar desde fórmulas de coidados que teñan en conta a saúde das relacións dentro da propia industria musical, sacando o foco da produtividade, que é a parte da que máis se adoita falar a nivel empresarial”, sinala Vila.