Nunca se viu un fenómeno fan na Galiza como o que hai ao teu redor. Percíbelo así?
Na rapazada é innegábel e o que me dá forza para seguir son todas esas nenas e nenos que sofren a gordofobia, a homofobia, xente con trastornos alimenticios… escríbenme un montón. Ven en ti unha imaxe de empoderamento, de individuo que, partindo dunha situación hostil, empodérase e decide loitar sen vitimismo. Ademais, coa galegofobia que hai… non vas conseguir gran cousa mais si eliminar determinado grao de galegofobia e de autoodio. Ao final, es un referente de normalidade e iso non se pode negar.
O mesmo xuntas xente na Galiza que fóra dela e non che preguntan por que cantas galego, algo que aquí che terán preguntado ducias de veces.
Non contesto esa pregunta porque me enfada moito. Xa contestei tantas veces mal a iso… porque non o consinto. Non consinto que non lle pregunten a Russian Red por que canta en inglés, ou a tantos grupos indie que cantan en inglés, e que me pregunten a min por que canto en galego. Non se atreverían a facerlle esa pregunta a Muguruza e a min si, e Muguruza e eu somos o mesmo. Sabes que pasa? A maioría da crema da intelectualidade galega sempre foi pedindo perdón a España e iso non o fixeron nin vascos nin cataláns e eu iso non o penso facer. Eu cada vez que chego alí digo, “A min gústame moito vir a España, encántame visitar o voso país, mais quero que saibades que cando deixe a música voume dedicar á política e o primeiro que vou facer vai ser conquistar o Estado e instaurar o galego como lingua única” e digo que “estou encantada de estar na capital do imperio” e rinse moito, mais saben perfectamente de que pau vou. Nunca neguei que son independentista e que por min marchaba mañá xa de aquí, cagando ostias.
Non te cortas nas redes sociais nin nos concertos.
É que non me avergoño. Desa maioría da crema da intelectualidade, o 90% cobrou moita pasta basicamente por non molestar, por non mollarse. Se te mollas como pobo que es, comezan os problemas. Eu teño que vender entradas. A min non me contratan algúns concellos que son do PP.
Non tes meto a que te prexudique expresarte de forma tan explícita?
E xa me prexudica, eu non podo tocar en Ourense. Estou vetada no Auditorio de Ourense. Un amigo meu díxome un día algo que considero moi certo: “Cando dis que non tes medo a que mañá teñas que traballar doutra cousa, é verdade”. E totalmente, non teño medo a traballar doutra cousa.
[Podes ler a entrevista íntegra no número 286 de Sermos Galiza, á venda na loxa e nos quiosques habituais]