A banda de pandereteiras Leilía será a pregoeira das festas do Apóstolo, que se celebrarán do 20 ao 31 de xullo en Santiago de Compostela de forma descentralizada e con concertos de Sarah Maccoy, Xabier Díaz e Ángel Stanich, ademais de espectáculos de danza e a tradicional queima de fogos artificiais o día 24.
Nunha rolda de prensa ofrecida esta quinta feira, a concelleira de Festas, Pilar Lueiro, explicou que se trata de actividades para "diversos públicos e en diversos espazos da cidade" e que incluirán, por primeira vez, un "horario inclusivo sen ruído". Este terá lugar durante os días 22, 28 e 29, entre as 17,00 e 19,00 horas.
Da mesma maneira que nos últimos anos, as festas realizaranse de forma descentralizada pola cidade compostelá, con espectáculos na Alameda, o Parque de Galeras, Praza da Quintana, Praza de Mazarelos, Auditorio da Galiza e Parque de Bonaval.
Ademais, na rolda de prensa, o técnico de cultura, Suso Amado, informou que o Concello investirá case 500.000 euros nos festexos, sen contar o orzamento co espectáculo dos fogos artificiais.
En canto á estimación de público, a concelleira destacou que non hai un número exacto de turistas esperados, xa que os espectáculos ocorrerán ao aire libre, pero a expectativa é que a cidade "vai estar a lume de biqueira".
Cartel das festas
Suso Amado explicou que o cartel deste ano é unha homenaxe feita por Pepe Barro a un deseñador galego que viviu moito tempo en California e inspírase na "psicodelia", os ambientes de "festas, de discotecas, en que os xogos de luces permitían que estes carteis tivesen un efecto de movemento".
Así, este efecto de movemento pode ser percibido co uso de lentes 3D, coas que se pode ver a imaxe sobreposta dun home e unha muller, co que tamén se busca dar unha "idea de igualdade" destes festexos.
Aínda que o Concello non porá ao dispor lentes 3D, nalgunhas presentacións que ocorrerán na Praza da Quintana o efecto será percibido a través de gifs, para que a xente observe a idea de movemento e de igualdade a que remite o cartel.
