"Guerrilla nace para perseguir a utopía a través da cultura. Unha cultura comprometida, alternativa, revolucionaria, de resistencia e accesíbel a todo o mundo". Con estas palabras presentan desde a organización o festival Guerrilla.
O obxectivo, pois, é "pór en valor as loitas sociais e culturais históricas que se artellaron" na Galiza e "demostrar que non están mortas". "É o vivo exemplo de que desde todos os recunchos da Galiza e do resto do mundo se están a facer pequenas accións culturais para construír unha sociedade xusta e para todos e todas".
Guerrilla en Pontevedra
Deste modo, con forza, chega o festival Guerrilla a Pontevedra os vindeiros días 7, 8 e 9 de outubro.
A cita, impulsada pola Concellaría de Cultura de Pontevedra e Culturactiva S. Coop. Galega, encherá a vila do Lérez de artistas referentes da cultura máis comprometida e social. "Vainos remexer por dentro, ninguén vai quedar indiferente", valorou a concelleira da área, Carmen Fouces.
Durante os tres días de festival terán como protagonistas dos faladoiros a Marwán, Iván Prado, Manuel Gago, Eva Mejuto, Montse Fajardo e María Xesús Escudeiro. Estas actividades potenciarán, segundo adiantan desde a organización, a conversa sobre a resistencia galega na II Guerra Mundial, a loita antifranquista en Pontevedra ou a poesía como motor de cambio. Pola súa banda, a artista Vero Rilo ofrecerá un espectáculo de narración oral sobre “Historias de amor, vida, guerra e case morte”.
Así mesmo, desde o festival Guerrilla destacan que Pontevedra é "o lugar perfecto para acoller este proxecto. Unha vila exemplar da resistencia a nivel cultural e social na Galiza".
Programación
Os pratos fortes da Guerrilla que ten programada Pontevedra chegarán a partir das 21 horas coas actuacións do cómico italiano Leo Bassi, o cantautor e poeta Marwán e a banda neoiorquina The Last Internationale.
Na quinta feira 7 de outubro arrancan con Yo, Mussolini, espectáculo do cómico italiano no que volve posicionarse fronte á extrema dereita cun show provocador e divertido nado do auxe da vella ideoloxía fascista.
Na sexta feira 8 de outubro subirán ao escenario do Teatro Principal o rock atrevido e político Edgey Pires e Delila Paz.
O cantautor e poeta Marwán volve sorprender co seu cuarto libro de poemas: Una mujer en la garganta. O sábado 9 ás 21 horas agasallará o público coas súas cancións e presentará esta obra na que hai lugar para a crítica, o desamor, a pena, a autoestima, o desarraigo, a ironía, a ruptura, a alegría, o loito, o desexo, o sexo, a compaixón ou a felicidade.
