martes 29/09/20
Ourense volve aos anos 20

A festa histórica A Bela Auria fócase no centenario de 'Nós'

O 19 de setembro retorna, malia o coronavirus, a festa histórica A Bela Auria á cidade de Ourense, que desta volta virá tinguida de festival literario en homenaxe ao centenario da revista Nós.
Dúas asistentes con traxes dos anos 20.
Dúas asistentes con traxes dos anos 20.

Baixo o lema "Celebremos Nós", o próximo sábado 19 de setembro volve a festa histórica A Bela Auria para recrear o esplendor cultural de Ourense nos anos 20 do século pasado. Xusto no centenario da publicación do primeiro exemplar da revista Nós, o evento vira desta volta con reberetes de festival literario.

Mais "non será outra homenaxe", advirten desde a asociación homónima, senón que pretenden visibilizar aspectos transversais e temáticas que aparecen en Nós: "a infancia, as mulleres que participaron na revista, a sexualidade, a festa, a creatividade ou a música", explica Óscar Penín, director do evento.

Esta edición da festa oriéntase desde unha óptica aberta e integradora, con traducións a lingua de signos, espazo amigábel coas mascotas, ou "música, son e luz sen estridencias".

Aliás, o recinto estase a deseñar desde a sostibilidade, con uso de materiais reciclados e reciclábeis para dar forma a "un universo mítico, máxico e plástico", que acollerá máis dunha ducia de horas de programación recuperando o Ourense clásico, o fervedoiro cultural que era a vida na cidade nos anos 20.

Adaptación á Covid-19

Conscientes das complicacións deste 2020 e ante as medidas impostas pola pandemia, a festa pensouse con actividades descentralizadas, amplitude de espazos, e control de capacidades que permitan manter a seguridade do público en todo momento. "Son moitas horas, hai oco para que todo Ourense atope A Bela Auria este día", afirma a organización.

Coa seguridade sempre por diante, instan deste modo a ir xa remexendo no baúl do faiado, na procura da vella chaqueta, boinas e chapeus, faldras e boas de plumas. As mellores roupas para "modear con estilo" na elegante e lucida cidade de Nós.

Unha década de asociación

A asociación cultural que promove a festa nacía nos primeiros meses de 2010, coa vontade de recuperar aquela cidade á que Otero Pedrayo lle deu o nome da Bela Auria, un título outorgado á "Atenas da Galiza" que "condensa o que calquera ourensán xa sabe: que a súa cidade é bela, e que é de ouro pola súa historia e a súa tradición cultural".

comentarios