Nesta festa de comezo de verán no Eido Dourado o programa estará composto polas actuacións musicais da cantante galego-palestina Najla Shami, o cantautor Tino Baz e os músicos Mini e Mero. Na parte literaria os versos da poeta Laura Branco xuntarase á intervención do escritor Carlos Reigosa arredor da obra do escultor Fernando Villapol autor da escultura que se inaugurará e pasará a tomar parte da colección da casa do artista mariñán. Manuel Lourenzo e Pepe Penabade ofrecerán as intervencións teatrais da velada,
Ao entrar no Eido Dourado descúbrese un espazo persoal que preside a marca do seu creador, o artista Celso Dourado. Alén da exposición permanente, o imaxinativo xardín e as portas abertas da casa definen a filosofía de encontro e creación que desvela a personalidade do seu autor. A marca do artista preside tamén a festa que este sábado día 30 convocará diante da praia das Pasadas a creadores de distintas especialidades artísticas nunha xuntanza que significa tamén o inicio da tempada na que o espazo artístico ten as súas portas abertas.
Celso Dourado quere mostrar coa súa iniciativa que outro tipo de xestión é posíbel e que se poden organizar proxectos culturais fóra das cidades e dos centros urbanos. Eido Dourado permanecerá aberto para as visitas ata setembro nunha tempada na que, xunto coa exposición temporal, quen se achegue poderá participar na programación cultural deseñada para o ceo aberto dos xardíns, elaborados polo propio artista con materiais naturais da zona evocando o deseño zen.
.
Para coñecer Eido Dourado ademais de entrar o espazo de Reinante pódese visitar a súa web.