domingo 19/09/21

Eli Ríos gaña con "Café intenso" a primeira edición do premio Rosalía de Castro de Padrón

Café intenso é o título co que a poeta Eli Ríos gaña a primeira edición do Premio Rosalía de Castro de poesía promovido polo Concello de Padrón. A escritora suma un máis a súa listaxe de recoñecementos literarios, desta volta, cun libro no que leva a violencia machista á poesía.  

Eli Ríos

Premio do Concello de Carral, Illas Sisargas, Figurante, Lueiro Rey, Francisco Añón, Centro Recreativo de Artes, Modesto R. Figueiredo, Pura e Dora Vázquez... e agora primeira edición do Rosalía de Castro que vén de crear o concello de Padrón. A poeta Eli Ríos suma con Café intenso un novo galardón un novo título a súa xenerosa listaxe de premios literarios. 

O xurado, desta volta, estaba composto polo presidente da Fundación Rosalía de Castro, Anxo Angueira e as profesoras Dolores Vilavedra, Ana Acuña, Olivia Rodríguez e María Jesús Senín ademais da técnica de cultura, Cruz Taboada que actuou como secretaria. Valoraron a “proposta innovadora na tradición europea experimental que, a partir do cotiá, constrúe un universo poético narrativo en conexión coas artes visuais” que ofrece o novo libro de Eli Ríos. 

Poesía contra violencia machista

“Pode que só nos interese a catro e que as/os demais sigan bruando contra os premios, festexando datas que nos esconden pero… sinceramente… prefiro agradecer a valentía deste xurado que saca á luz un texto no que unha muller é asasinada pola violencia machista porque no momento que a poesía desconecte da realidade, que papel teremos as persoas que creamos na mudanza deste imaxinario que nos mata?”, escribe a escritora no seu blog sobre o libro premiado. 

A escritora non ofrece, como sinala, unha “chamada á tristura e á desesperación”, senón á loita, neste caso desde a poesía, na vontade de mover para que a situación mude. 

nós escoitando o badalo de Marienplatz (Espiral Maior, 2010), Maria, (O Figurante, 2013),  Anamnese, (Sotelo Blanco, 2014) ou Diario de fotogramas, (Concello de Ribeira, 2014) son algúns dos seus anteriores títulos. 

Eli Ríos gaña con "Café intenso" a primeira edición do premio Rosalía de Castro de Padrón
comentarios