As efémeras discografías dixitais

Bandcamp non é unha das plataformas de streaming e venda de música máis utilizadas, lonxe de xigantes como Spotify ou Apple Music. Con todo, Bandcamp converteuse desde hai anos nunha ferramenta fundamental para os artistas, especialmente os artistas independentes sen acordos con grandes discográficas, como é o caso da gran maioría da música galega, que agora se atopa nunha situación complexa que ameaza mesmo seu futuro. A diferenza doutras plataformas, Bandcamp permite aos músicos publicar de forma directa as súas cancións na plataforma sen precisar de intermediarios como si acontece noutros servizos de streaming. Ademais, Bandcamp é recoñecida por ser unha das plataformas para a comercialización de música que mellor retribúe os artistas, que levan até o 82% do prezo dun disco ou unha canción, unha porcentaxe que nas primeiras sextas feiras de cada mes ascende até 93%, a través dunha iniciativa chamada ‘Bandcamp fridays’ que comezou durante a pandemia da Covid para axudar os artistas ante a imposibilidade de actuar en directo pero que continuou no tempo. En Bandcamp pódense atopar as discografías da gran maioría das bandas e artistas galegas. Nesta plataforma pódese escoitar e mercar toda a discografía de Grande Amore, Ortiga, Malandrómeda ou Baiuca e mesmo todos os lanzamentos de discográficas enteiras como Ferror Records. 'Bandcamp' é unha das plataformas de música que mellor retribúe os artistas, que levan até 82% do prezo dun disco ou canción Con todo, o futuro de todo este catálogo musical é incerto, unha preocupación non menor nun momento no que cada vez resulta máis frecuente que se retiren contidos das plataformas de streaming imposibilitando o seu acceso excepto para aquelas persoas que dispoñen de copias físicas ou dos arquivos dixitais mercados. O modelo das subscricións baséase en que os usuarios nunca son os donos da música, cuxa dispoñibilidade depende do interese ou a subsistencia da compañía que ofrece o servizo. Primeira compra A historia de Bandcamp comezou a complicarse cando foi mercada en maio do ano pasado por Epic Games, nada máis e nada menos que a compañía que desenvolve o popular videoxogo Fortnite. O que nun primeiro momento resultara un movemento sorprendente dunha empresa centrada nos videoxogos sen nada que ver coa música cobrou sentido cando se coñeceu que tanto Bandcamp como Epic Games tiñan demandas abertas con Google, e no caso concreto da de Bandcamp as súas perspectivas eran mellores. Detrás destes litixios estaba en ambos os dous casos a comisión do 30% que cobra Google de todas as compras que se realizan a través das aplicacións móbiles descargadas desde a súa tenda. O xigante Epic Games quería non ter que pagar un terzo dos ingresos que percibía da venda das skins ou os personaxes desbloqueables do Fortnite, mentres que a pequena distribuidora de música independente Bandcamp buscaba o mesmo das ventas de discos que se realizaban desde a súa aplicación, da que xa daba unha amplísima porcentaxe aos artistas. En maio de 2022, Bandcamp e Google chegaron a un acordo temporal para reducir esta comisión. Para Epic Games, Bandcamp valía máis pola súa demanda, que daba pasos adiante máis rapidamente contra Google pola disparidade da relación entre o xigante tecnolóxico e esta pequena empresa musical. Con todo, dende entón non se coñeceron novos avances e a demanda de Bandcamp semella terse complicado. Proba diso é que Epic Games decidiu vender Bandcamp o pasado mes de setembro ao atopar máis progresos no seu propio proceso xudicial con Google, que acaba de resolverse en contra do xigante tecnolóxico. Mentres tanto, o novo dono de Bandcamp é Songtradr, a maior empresa licenciadora de música na actualidad para o seu uso en películas, series, anuncios ou videoxogos Segunda compra Pero esta non foi a única noticia que chegou. Con esta compra, os novos donos despediron a preto da metade do cadro de persoal, principalmente os traballadores do apartado editorial, que se dedicaban a organizar, recomendar e escribir sobre algúns dos lanzamentos máis interesantes dos incontables discos que se soben cada día á plataforma e que permitían descubrir novos artistas cuxa música en moitas ocasións non está dispoñible en Spotify. Polo de agora Songtradr dixo que non habería cambios nos servizos que ofrece Bandcamp ou nas porcentaxes de pago favorables que pagan aos artistas, e avanzaron novas opcións de licenciar a música a través de Bandcamp. Todo apunta a que empregarán Bandcamp para maximizar os beneficios da súa actividade en lugar do modelo actual, ademais, os numerosos despidos e a sucesión de vendas da compañía provocaron unha comprensible preocupación entre numerosos artistas polo futuro da plataforma. Como xa quedou claro con varias series e películas en streaming, as plataformas dixitais son efémeras, e máis alá dos lanzamentos físicos, o futuro da distribución dixital depende do de empresas como Bandcamp.